Konstıtýtsııalyq reforma ekonomıkaǵa jańa qarqyn beredi - sarapshy

ASTANA. QazAqparat - Qazirgi tańda elimizde utymdy bıznes júrgizýge túgel jaǵdaı jasalǵan. Buǵan 2005-2016 jyldar aralyǵynda 260 mlrd. AQSh dollarynan astam sheteldik ınvestıtsııanyń tartylǵany da aıǵaq bolady. Sońǵy kezderi ekonomıkaǵa shetelden qarjy tartý boıynsha ózge de damýshy elderdiń básekelestigi artýyna baılanysty, Qazaqstan osy saladaǵy óz artyqshylyqtaryn usynýy qajet. Astana Halyqaralyq qarjy ortalyǵy (AHQO) ­- Qazaqstannyń dál osy ınvestıtsııa tartý qýatyn arttyratyn ınstıtýttardyń biri.

Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń ǵylymı qyzmetkeri B. Syzdyqovtyń aıtýynsha, mundaı iri ekonomıkalyq qadamdar jasaýǵa Elbasy bastama kótergen konstıtýtsııalyq reforma keń múmkindikter beredi.

«Elorda aýmaǵynda AHQO qurý jáne onyń tıimdi jumys isteýin qamtamasyz etý Konstıtýtsııanyń 2-babyn 3-1 tarmaǵymen tolyqtyrýǵa baılanysty. Oǵan sáıkes, «Astana qalasynyń aýmaǵynda konstıtýtsııalyq zańǵa sáıkes, qarjy salasyndaǵy erekshe quqyqtyq rejım ornatylýy múmkin», - deıdi maman.

QSZI ǵylymı qyzmetkeriniń sózine qaraǵanda, AHQO baǵaly qaǵazdar, bank, saqtandyrý qyzmetteri naryqtaryn, ıslamdyq qarjylandyrý naryǵyn damytý arqyly sheteldik ınvestıtsııalardy tartýdyń qýatty quralyna aınalady.