Konstıtýtsııa kúnine oraı bir top aqmolalyq marapattaldy
«Kókshetaý» mádenıet saraıynda bolǵan merekelik sharaǵa Aqmola oblysynyń qurmetti azamattary, memlekettik mekemelerdiń basshylary, shyǵarmashylyq jáne ǵylymı ıntelegentsııa, qoǵamdyq uıymdar, depýtattar korpýsy jáne jastar qatysty.
Jınalǵan qaýym aldynda aımaq basshysy Ermek Marjyqpaev sóz sóılep, jerlesterin Konstıtýtsııa kúni merekesimen quttyqtady.
«Osydan 24 jyl buryn búkilhalyqtyq referendýmda qabyldanǵan Ata Zańymyz myqty táýelsiz memleket qurýdyń berik irgetasyna aınaldy. Osy jyldar ishinde Tuńǵysh Prezıdent – Elbasy Nursultan Ábishuly Nazarbaevtyń tereń oılastyrylǵan baǵytynyń, Qazaqstan halqynyń tyǵyz toptasýy men janqııarlyq eńbeginiń arqasynda bizdiń elimizde ulan-ǵaıyr áleýmettik-ekonomıkalyq jáne saıası qaıta qurýlar tabysty júrgizildi.
Búgingi tańda bizdiń aldymyzǵa azamattardyń ál-aýqaty men turmysyn odan ári arttyrýǵa baǵyttalǵan keń kólemdi memlekettik baǵdarlamalardy iske asyrý jóninde mańyzdy mindetter qoıylyp otyr. Osy bir tamasha mereke Sizderdiń Otan ıgiligi jolyndaǵy ıgi qadamdaryńyzǵa jańa serpin bersin», - deı kele, aımaq basshysy bir top kókshetaýlyqqa jańa páterdiń kiltin jáne eseli eńbekterimen oblystyń damýyna eleýli úles qosqan azamattarǵa óz qolymen Alǵys hattaryn tabys etti.
Aqmola oblystyq sotynyń tóraǵasy Dosjan Ámirov, Kókshetaýdaǵy «Vıdergebýrt» nemis ulttyq ortalyǵynyń tóraıymy Svetlana Korneeva sóz sóılep, Táýelsiz elimizdiń damýynda Ata Zańymyzdyń mańyzdylyǵyna toqtaldy.
