Konstıtýtsııa kúnine oraı Aqtóbede 37 azamat baspanaly boldy
Páter kiltin oblys ákimi Ońdasyn Orazalın saltanatty túrde tabystap, baspana ıelerin Konstıtýtsııa kúnimen qatar kelgen qýanyshty sátterimen quttyqtady.
«Elbasy áleýmettik saıasat salasyndaǵy sharalardyń iske asyrylýyn egjeı-tegjeıli qarastyryp, turmysy nashar jáne áleýmettik turǵydan az qamtylǵan turǵyndarǵa qoldaý kórsetý jóninde jańa aýqymdy sharalar usyndy. Kópbalaly analarǵa, tolyq emes otbasylar men múgedek jandarǵa erekshe kóńil bólinip, birqatar jeńildikter qarastyrylǵan. Bıyl Aqtóbe oblysynda 1209 páterden turatyn 4 toǵyz qabatty jáne 9 az qabatty turǵyn úı tapsyryldy»,-dep atap ótti aımaq basshysy.
Maýsym aıynan bastap elimizde «Baqytty otbasy» dep atalatyn jańa baǵdarlama iske qosyldy. Baǵdarlama aıasynda tabysy tómen kópbalaly, tolyq emes jáne múgedek bala tárbıelep otyrǵan otbasylarǵa jylyna 2% mólsherlememen 19 jylǵa nesıe berý kózdelgen. Baǵdarlamaǵa joldama alý maqsatynda 1400 otbasydan ótinish túsken, 536 otbasy tólem qabiletin dáleldegen. Búgin alǵashqylardyń biri bolyp tólem qabiletin rastaǵan 37 otbasyǵa páter kilti tabystaldy.
Aqtóbe qalasy Qurashasaı aýyly, «Qanaǵat» turǵyn massıvinde jańa mektep paıdalanýǵa berildi. Oblys ákimi №77 jalpy bilim beretin orta mekteptiń ashylýyna qatysty. 600 orynǵa arnalǵan bilim oshaǵynda 30 oqý kabıneti, sport zaly, 210 orynǵa arnalǵan ashana, 130 oryndyq akt zaly bar. Odan ózge mýltımedııalyq, ınteraktıvti taqtaly kabınetter, fızıka, hımııa kabınetteri jumys jasaıdy. Beınekameralarmen jabdyqtalǵan.
Alǵa aýdany Jeruıyq aýylynda da 60 oryndyq mektep paıdalanýǵa berildi. Óńir basshysy bilim oshaǵynyń ashylý saltanatyna qatysyp, ustazdar men oqýshylardy jańa oqý jylymen quttyqtady. «Halqymyzda «bilimdiniń kúni – jaryq» degen jaqsy sóz bar. Ashylǵaly otyrǵan mekteptiń tabaldyryǵyn bilim kúni 41 oqýshy attaıtyn bolady. Qazirgi tańda oblysymyzda 21 mektep salyný ústinde. Bıyl 15 mektepti el ıgiligine berý josparda bar. Onyń segizi jańa oqý jyly qarsańynda paıdalanýǵa berilmek»,-dedi Ońdasyn Orazalın.
Oblys ákimi mektep ishin aralap, sport zal, ashana, jylý qazandyǵyn kórdi.
Aıtyp óteıik, Alǵa aýdanynda úsh aýysymdy mektep máselesi sheshilgen. Ońdasyn Orazalın 150 orynǵa arnalǵan «Bopaı» balabaqshasynyń ashylý sharasyna qatysty. Balabaqshada úsh qazaq toby, úsh orys toby jumys isteıdi. Mýzyka, sport zaly, medıtsınalyq kabınet, logoped, psıholog kabıneti, tuz shahtasy, tigin bólmesi, ashana, oıyn jáne jatyn bólmeleri, zamanaýı balalar jıhazdarymen, oıynshyqtarymen jabdyqtalǵan. Quny 600 mln teńgeni quraıdy.
Óńir basshysy jaýapty mamandarǵa mektepterdiń kitaptarmen tolyqtaı qamtamasyz etilýin, jáne mektepke deıingi mekemelerdiń qyzmet sapasyn arttyrýdy tapsyrdy.