Konstıtýtsııa kúni qarsańynda 106 pavlodarlyq qonys toıyn toılady

PAVLODAR. QazAqparat - Búgin Pavlodarda Konstıtýtsııa kúni qarsańynda «Saryarqa» shaǵynaýdanyndaǵy «Turǵyn úı qurylys jınaq bankiniń» salymshylaryna arnalǵan eki toǵyz qabatty úı qoldanysqa berildi, dep habarlaıdy pavlodarnews.kz .

Lomov kóshesi 152/2 jáne 152/3 mekenjaıyndaǵy toǵyz qabatty úılerdiń birinde 54 páter (eki bólmeli - 36, úsh bólmeli - 18) bolsa, ekinshisinde 52 páter (eki bólmeli - 34, úsh bólmeli - 16, tórt bólmeli - 2) bar.

 «Jyl basynan beri óńirde 109 myń sharshy metr paıdalanýǵa berildi», - dedi oblys ákimi Bolat Baqaýov. «Bul ótken jylǵy kórsetkishpen salystyrǵanda 1,4 paıyzǵa joǵary. Qala ishinde ótken jylmen salystyrǵanda 156 paıyzǵa artyq 95 myń sharshy metr baspana qoldanysqa berildi. Osy shaǵynaýdanda aýmaǵy 24 myń sharshy metr bolatyn 360 páterlik úsh úı salynýda. Árıne, bar kúshin salyp, eńbektenip jatqan qurylysshylardyń eńbegin atap ótpeýge bolmaıdy. Barlyqtaryńyzdy qonys toıymen quttyqtaımyn».

Eske sala ketsek, 2017 jyly «Nurly jer» baǵdarlamasy aıasynda «Saryarqa» shaǵynaýdanynda tórt kópqabatty úıdiń qurylysy júrýde. 31,1 myń sharshy metrdi quraıtyn úıler 392 páterge shaqtalǵan. Kezekte turǵandar úshin 212 páter eki úıden bólindi, qalǵan 180 páter súrilgen úılerdiń ıelerine tabystalady. Jyl sońyna deıin Shókın kóshesi 159/3, Pavlov kóshesi 95/1, 93/1 mekenjaılaryndaǵy kóp qabatty úıler paıdalanýǵa berilmek.