Konstıtýtsııa kúni aqtóbelikter baspanaly boldy

AQTÓBE. QazAqparat - Mereke kúni 30 aqtóbelik «Qazaqstan ıpotekalyq kompanııasy» AQ (QIK) arqyly baspanaly boldy.  Jalpy bıyl páter kezeginde turǵan 500-den astam aqtóbelik qonys toıyn toılamaq, dep habarlaıdy QazAqparat tilshisi.

Oblys ortalyǵyna Embi qalasynan qonys aýdarǵan І top múgedegi Aıbek Úbishev birinshi qabattaǵy 2 bólmeli páterge qonystandy. Ol 10 jyl boıy páter jaldap kelgen.

"2011 jyly turǵyn úı qoryn esepke alý sektoryna qujat tapsyryp, bıyl jańa baǵdarlamanyń konkýrsyna qatystym. Eki bólmeli páterge 40 myń teńge tóleımin. 20 jylǵa nesıege alyndy. Óte tıimdi, úlken qyzym kepilger boldy. Ol jedel járdemde feldsher bolyp jumys isteıdi. Ekinshi balam da jumysta, tabysymyz jetkilikti",- dedi Aıbek Úbishev.

Búgin barlyǵy 30 otbasy baspanaly boldy. Qonys toıyn toılap jatqan aqtóbelikterdi oblys ákimi Berdibek Saparbaev quttyqtady.

"Árkim úshin eń negizgi másele - baspana. Osydan 2 jyl buryn jańa aýdanda túk bolmady. Memlekettik baǵdarlamalardyń arqasynda kóptegen úı salyndy. Úıdi áleýmettik qoldaýdy talap etetin adamdarǵa berý kerektigin túsinemiz. Bul joly «QIK» arqyly úı berilip jatyr. Jumys ári qaraı jalǵasady",- dedi oblys ákimi B.Saparbaev.

Aıta keteıik, Aqtóbe qalasynda 21 myńnan astam adam páter kezeginde tur. Memlekettik baǵdarlamamen úı alýdy maqsat etken adamdar sany kún sanap artyp keledi.