Konstıtýtsııa qoǵamnyń negizgi tiregin nyǵaıtady - Marat Jumaǵulov
«Qazaqstan Respýblıkasy Konstıtýtsııasynyń 25 jyldyǵyn atap ótken kezde onyń oń tájirıbesin qarastyryp ári baıyta otyryp, konstıtýtsııalyq-quqyqtyq saladaǵy quqyqtyq ınstıtýttardyń pármendiligin saraptaý qajet. Ol óziniń quqyqtyq damýyn, Ata zańymyzdyń áleýetin odan ar paıdalaný boıynsha sharalar ázirleýdi talap etedi», - dedi ol.
Onyń aıtýynsha, Konstıtýtsııa jalpyqamtymdy zań retinde qoǵam men memlekettiń, adam quqyǵynyń, ortalyq jáne aýmaqtyq memlekettik organdar júıesiniń negizgi tiregin bekitedi.
«Konstıtýtsııa mazmunyndaǵy mańyzdy quqyqtyq ınstıtýttardan jergilikti ózin-ózi basqarý ınstıtýtyn bóle qarastyrýǵa bolady. 89-baby 2-tarmaǵyna sáıkes, Jergilikti ózin-ózi basqarýdy turǵyn halyq tikeleı saılaý jolymen, sondaı-aq halyq toptary jınaqy turatyn aýmaqty qamtıtyn selolyq jáne qalalyq jergilikti qaýymdastyqtardaǵy saılanbaly jáne basqa jergilikti ózin-ózi basqarý organdary arqyly júzege asyrady», - dedi sarapshy.
Onyń atap ótýinshe, bir jaǵynan ózin-ózi basqarý organdary el basqarýdyń biryńǵaı júıesimen yqpaldastyrylǵan. Jergilikti ózin-ózi basqarýdyń negizgi zańdar men ózge de quqyqtyq aktiler arqyly qoldanysta bolatyn apparaty bar jáne bıýdjet qalyptastyrýǵa qatysady. Máselen, QR Bıýdjet kodeksiniń 52-1-baby 2-tarmaǵy 3-tarmaqshasyna sáıkes, aýdandyq mańyzy bar qalanyń, aýyldyń, kenttiń, aýyldyq okrýgtiń kommýnaldyq menshiginen (jergilikti ózin-ózi basqarýdyń kommýnaldyq menshiginen) túsetin kirister aýdandyq mańyzy bar qala, aýyl, kent, aýyldyq okrýg bıýdjetterine túsetin túsimder bolyp tabylady.
Ekinshi jaǵynan jergilikti ózin-ózi basqarý azamattyq qoǵamnyń mańyzdy elementi, jekelegen qoǵamdastyqtardyń saıası ózin-ózi uıymdastyrý formasy sanalady.