Konstıtýtsııa - Qazaqstannyń turaqty damýyna quqyqtyq negiz qalady - pikir
Bul týraly QR Konstıtýtsııasynyń 25 jyldyǵyna oraı pikir bildirgen QR Parlamenti Senatynyń depýtaty Edil Mamytbekov aıtty, dep habarlaıdy QazAqparat.
«Ákimshilik jáne quqyqtyq reformalar, jergilikti ózin ózi basqarýdy damytý, áleýmettik jańǵyrtý – munyń bári berik konstıtýtsııalyq negizde júzege asyrylǵan jáne halyqtyń ómir súrý deńgeıin odan ári ulǵaıtýǵa baǵytalǵan sharalar. Bizdiń syrtqy saıasattaǵy júıeli bastamalarymyz Qazaqstannyń halyqaralyq bedeliniń udaıy ósýin qamtamasyz etýde.
Osydan 25 jyl buryn Qazaqstan halqy tarıhı tańdaý jasap, búkilhalyqtyq referendýmda elimizdiń Konstıtýtsııasyn qabyldady.
Qoǵamnyń órkendeýine qarqyn qosyp, Qazaqstan halqynyń birligine jol bastaǵan Ata Zańda bekitilgen respýblıkamyzdyń tuǵyrly qaǵıdattary búginde óziniń ómirsheńdigin dáleldep otyr»,-deıdi depýtat.
Onyń sózinshe, yntymaǵy jarasqan Qazaqstan halqynyń qarymdy isteri búginde álem jurtshylyǵy úshin úlgi-ónegege aınaldy.
«Munyń ózi bizdiń Ata Zańymyzda búkiladamzattyq qundylyqtar men órkenıettik ıgilikterdiń barlyǵy qamtylǵanyn aıǵaqtaıdy. Sol tusta Nursultan Nazarbaev Prezıdent retinde Konstıtýtsııanyń senimdi kepili bola tura azamattardyń quqyqtary men bostandyqtaryn qorǵaý, zań ústemdigin qamtamasyz etý, quqyqtyq memleket qurý baǵytyn berik ustandy.
Qoǵamnyń órkendeýine qarqyn qosyp, Qazaqstan halqynyń birligine jol bastaǵan Ata Zańda bekitilgen konstıtýtsııalyq normalar búginde qoǵamdyq ómirimizben bite qaınasyp, óziniń ómirsheńdigin dáleldep keledi»,-dep tolyqtyrdy sózin senator.
Onyń paıymynsha, negizgi Zańnyń qaǵıdattary Qazaqstannyń turaqty damýyna quqyqtyq negiz qalap, azamattardyń ál-aýqatyn jaqsartýdyń kepili bolyp otyr.
«Bizdiń aldymyzda, eń aldymen, ındýstrıalyq-ınnovatsııalyq damýǵa jáne jańa áleýmettik saıasatty baıandy etýge baǵyttalǵan aýqymdy memlekettik baǵdarlamalardy júzege asyrý jónindegi asa mańyzdy mindetter tur.
Konstıtýtsııamyzdyń memleket pen qoǵam úshin ǵana emes, sondaı-aq jeke ózimiz, otbasymyz ben balalarymyz úshin mańyzdylyǵyn árqaısymyz jete túsinip baǵalaýymyz qajet. Sondyqtan árbir azamat konstıtýtsııalyq quqyqtaryn bilip, sol zańdardyń talaptaryna baǵynýy kerek. Ata Zańnyń qaǵıdattary men normalaryn ustaný, konstıtýtsııalyq qundylyqtardy qorǵaý – árbir azamattyń qurmetti paryzy jáne qasıetti mindeti»,-deıdi depýtat.
Ol táýelsizdik pen Ata Zań – egiz uǵym ekendigin aıtady. Egemen el bolmaı, Konstıtýtsııa jazylmaıdy, al Ata Zańsyz azattyqty elestetý múmkin emes! Óıtkeni adam, onyń ómiri, quqyqtary men bostandyqtary, demokratııalyq qundylyqtar Negizgi Zańymyzdyń basty qaǵıdattary men ustanymy bolyp tabylady jáne onyń kemeldiligin aıǵaqtaıdy. Ata Zańy qýatty eldiń bolashaǵy shýaqty. Tamyry tereńge tartqan «Qasym hannyń qasqa joly», «Esim hannyń eski joly», Áz Táýkeniń «Jeti jarǵysynyń» jalǵasyndaı bolǵan Konstıtýtsııa – Eýrazııa júregindegi Uly dalanyń árbir jetistiginiń, árbir tabysynyń kepili. Bir kezdegi QR Tuńǵysh Prezıdenti – Elbasy N.Á. Nazarbaevtyń: «Uly dalada jańa turpatty qýatty memleket quryp, ulysty uıystyrdyq ... Sondyqtan biz baıandy isterimizdiń bastaýy bolǵan bas qujatymyzdy ardaqtaýymyz kerek», – deýiniń tereń máni bar.
«Konstıtýtsııany buljytpaı oryndaý ári onyń qaǵıdalaryn tabysty júzege asyrý – ortaq mindetimiz. Ata Zań – Táýelsizdiktiń teńdessiz tartýy. Azattyqtyń boıtumary da, altyn tarazysy da – Ata Zań.
Ata zańymyz – el tynyshtyǵynyń kepili. Máselen keshegideı ótpeli kezeń respýblıka Prezıdentin saılaý kezinde sol Ata zańymyzdyń qanshalyqty mańyzdy ekenin kópshilik túsindi. Bir adamnan ekinshi adamǵa bılik aýysar kezde nebir dúrbeleńder bolatyny ras. Tipti keıbir elderde sol janjaldyń arty úlken qaqtyǵystarǵa da ulasyp ketip jatqanyn kózimiz kórip otyr. Bizdiń elde bılik aýysý, birinshiden, joǵary deńgeıde, mádenıetti ótti, ekinshiden, qaqtyǵyssyz beıbit jolmen berildi. Jańa Prezıdentimiz Qasym-Jomart Kemeluly Toqaev memlekettik saıasattyń sabaqtastyǵyn saqtaı otyryp, eldiń damý jolyn senimdi, salıqaly túrde jalǵap keledi. Mine osy irgeli ózgeristerdiń barlyǵyn elimiz Ata zańymyzǵa arqa súıep otyryp iske asyrdy. Sondyqtan Konstıtýtsııanyń memleket pen qoǵam ómirindegi, onyń damýyndaǵy orny eleýli»,-dep qorytady sózin Edil Mamytbekov.