Kongress Tramptyń áskerı ókilettikteri týraly qarardy buǵattady

ASTANA. KAZINFORM – AQSh Ókilder palatasynyń spıkeri Maık Djonson (Lýızıana shtatynan respýblıkashyl) AQSh-tyń Iranǵa aralasýyna jol bermeýge baǵyttalǵan áskerı ókilettikter týraly eki partııaly qararǵa qarsy shyqty, bul prezıdent Donald Trampty qoldaýdyń kórinisi boldy, dep habarlaıdy The Hill.

Ótken aptada Tomas Messı (Kentýkkı shtatynan respýblıkashyl) jáne Ro Hanna (Kalıfornııadan demokrat) Trampty Kongress ruqsatynsyz shetelde AQSh áskerı kúshterin «paıdalanýdy toqtatýǵa» baǵyttaıtyn soǵys ókilettikteri týraly qarardy usyndy.

- Qazir áskerı ókilettik týraly sheshim qabyldaýdyń ońtaıly ýaqyty emes dep sanaımyn jáne bul qajet dep oılamaımyn, - dep málimdedi Maık Djonson.

Spıker 80 jyl boıy eki partııanyń da prezıdentteri áskerı soqqylardy Kongrestiń maquldaýynsyz sanktsııalap kelgenin atap ótti. Prezıdent Djo Baıden Taıaý Shyǵysta úsh márte áskerı operatsııalar júrgizdi. Barak Obama bolsa rejımdi taqtan taıdyrý úshin 8 Lıvııaǵa qarsy 8 aılyq naýqandy bastady.

- Men demokrattardyń buǵan qarsy bolǵanyn buryn-sońdy estigen emespin, al búgin olar bulqan-talqan bolyp ashýlanyp jatyr. Munyń bári saıasat. Qazir saıasattyń ýaqyty emes, - dep qosyp ótti spıker.

Djonsonnyń ustanymyna qaramastan, Messı men Hanna zań jobasy 17 maýsymda usynylǵan soń 15 kúnnen keıin de qarar boıynsha daýys bere alady.

AQSh-tyń Iranǵa áýe shabýylyna reaktsııa saıası partııalar boıynsha bólindi: demokrattar Tramptyń Kongrestiń ruqsatynsyz Iranǵa shabýyl jasaý sheshimin synasa, respýblıkashyldar Tegerannyń ıadrolyq baǵdarlamasyn tejeý qadamyn quptady.

Buǵan deıin kongresmender Tramptyń Izraıl men Iran arasyndaǵy qaqtyǵysqa aralasý ókilettigin shekteýge umtylǵany týraly habarlanǵan bolatyn.