Kongo-qyrym qandy bezgegi nesimen qaýipti
«Qazaqstandaǵy KQQB -nyń tabıǵı oshaqtary - Jambyl, Qyzylorda, Túrkistan oblystarynyń jáne Shymkent qalasynyń aýmaqtary. Jyl saıyn KQQB boıynsha qolaısyz óńirlerde 9-dan 25-ke deıingi jaǵdaı tirkeledi. Onyń arty ólim-jitim jaǵdaıyn ákeletinin aıta ketý kerek. Ótken jylyrespýblıka halqy arasynda KQQB aýrýynyń 18 jaǵdaıy tirkelgen edi. Onyń ishinde 5 jaǵdaı Túrkistan oblysynda, 9-y Jambyl oblysynda jáne 4-ýi Qyzylorda oblysynda», - deıdi ol.
Bekshınniń aıtýynsha, 18 jaǵdaıdyń 4-ýi ólimmen aıaqtalǵan.
«Osy jyly Jambyl oblysynda ata-anasymen Qyrǵyz Respýblıkasynan kelgen Ózbekstan azamatshasynyń 10 jasar balasynda Kongo-qyrym qandy bezgeginiń bir jaǵdaıy (Ózbekstannan) tirkeldi. Tabıǵı oshaqtardyń turaqty bolýynyń sebebi - osy aýmaqta QQGB vırýsyn tasymaldaýshy kenelerdiń mekendeýi. Kene shaqqanda ınfektsııa bir jyly qandy janýardan ekinshisine, sonyń ishinde adamǵa qan arqyly beriledi. Infektsııanyń negizgi kózi - kene», - deıdi Bas sanıtar.
Jandarbek Bekshın budan basqa bul óńirlerde aýyl sharýashylyǵy janýarlary men úı qustary da adamǵa KQQB -ny juqtyratynyn atap ótti. Atap aıtqanda, aýyl sharýashylyǵy janýarlaryn baǵý, saýý kezinde, ásirese olardy qyrqý, soıý kezinde juǵady.
«Bul jaǵdaıdyń ýshyǵýyna kenelerdiń kóbeıýine alyp keletin eldi mekenderdegi antısanıtarııalyq jaǵdaı yqpal etedi (qoradaǵy qı, turmystyq qoqys jáne stıhııalyq qoqys tastaıtyn jerler, eldi mekenderdiń aınalasyndaǵy janýarlardyń ólekseleri). Bizdiń respýblıkadaǵy sońǵy epıdemıologııalyq zertteý ıtter men úı qustarynyń da QQGB vırýsynyń tasymaldaýshysy bolatynyn kórsetti. KQQB taralýynyń aldyn alý úshin kenege qarsy óńdeýdi ýaqtyly júrgizý qajet. Dezınsektsııalyq preparattarmen tıimdi óńdeý úshin aýmaqty aldyn ala mindetti túrde tazalaý qajet», - deıdi ol.
Densaýlyq saqtaý mınıstrliginiń Qoǵamdyq densaýlyq saqtaý komıteti halyqtyń QQGB-men syrqattanýynyń aldyn alý boıynsha mynadaı is-sharalar ótkizedi:
- epıdemıologııalyq maýsym kezeńinde epıdemıologııalyq jaǵdaıǵa apta saıyn monıtorıng;
- KQQB boıynsha qolaısyz barlyq eldi mekenderdiń aınalasynda sanıtarııalyq-qorǵanysh aımaqtaryn qurý úshin aýmaqty kenege qarsy óńdeý;
- KQQB -dan saqtanýdy arttyrý maqsatynda medıtsına qyzmetkerlerimen semınarlar;
- KQQB boıynsha halyq arasynda sanıtarııalyq-aǵartý jumystary, onyń barysynda aýrýdyń alǵashqy belgileri, sondaı-aq kene shaqqan jaǵdaıda mindetti túrde jáne ýaqytynda medıtsınalyq uıymdarǵa júginý qajettigi túsindiriledi;
- KQQB tabıǵı oshaǵynda turǵan medıtsınalyq mekemelerde KQQB -men aýyratyn naýqastardy emdeý úshin vırýsqa qarsy preparattar men ımmýnızatsııalanǵan plazma qory bar.
Sanıtarııalyq-epıdemıologııalyq qyzmet uıymdarymen bir mezgilde veterınarııalyq qyzmet mamandary býferlik aımaqtarǵa (butalar, sýattar jáne turaqty nemese ýaqytsha eldi mekenderdiń tóńiregindegi aýyl sharýashylyǵy janýarlarynyń basqa da turatyn oryndary), mal men mal qoralaryna kenege qarsy óńdeý júrgizedi.
«KQQB -dan qorǵaný maqsatynda halyqqa mynadaı keńes beremiz: janýarlardy qyrqý kezinde qolǵapty paıdalaný, qolǵapty sheshkennen keıin qoldy sabynmen jýý qajet. Keneni qolmen janshýǵa jol bermeý. KQQB boıynsha endemııalyq óńirlerde tabıǵatqa nemese jaıylymǵa shyqqan kezde kenelerdiń shaǵýyn boldyrmaý úshin uzyn jeńdi ashyq tústi tyǵyz matadan jasalǵan kıim kııý qajet. Shalbar shulyqqa jáne jabyq aıaqkıimge salynýy tıis. Ózderińizdi jáne kıimderińizdi keneni tabý úshin qaıta-qaıta muqııat qaraý kerek. Deneniń ashyq bólikteri men kıimdi reppellenttermen óńdeý kerek. Kene shaqqanda, kenetten temperatýranyń kóterilýi, jıi (70%) qaltyraý, qarqyndy bas aýyrýy, barlyq deneniń syrqyraýy, keıde júrek aıný men qusý, murynnan, qyzyl ıekten qan ketý, bet terisiniń, moıynnyń jáne deneniń joǵarǵy bóliginiń gıperemııasy sııaqty aýrýdyń alǵashqy sımptomdary baıqalǵanda tez arada dárigerge qaralý kerek», - deıdi Jandarbek Bekshın.