Kóne Qyshqala qalashyǵyn zertteýshiler jańa derekterge qol jetkizdi
Qyshqalada arheologııalyq zertteý jumystary bastalǵanyn buǵan deıin habarlaǵan bolatynbyz. Arheologııalyq qazba jumystary Qyzylorda oblysynyń Tarıhı jáne mádenı muralardy qorǵaý jáne paıdalaný jónindegi ǵylymı-ádistemelik keńestiń sheshimimen qolǵa alynyp otyr. Qazba jumystaryn elimizge belgili tarıhshy-arheolog Madııar Eleýov basshylyq etetin «Arheolog» halyqaralyq ǵylymı-zertteý ortalyǵy júrgizýde. Joba Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy jáne «Uly dalanyń jeti qyry» maqalasy aıasynda júzege asyrylyp otyr.
Búgingi kúnderi Qyshqala aýmaǵynan kóptegen qundy jádigerler arshylyp alyndy. Olar kóne mekenniń Barshynkent bolýy múmkin degen joramalyn naqtylaı túsedi. Arheologtardyń aıtýynsha, atalmysh qalashyqty zertteý Syr boıyndaǵy orta ǵasyrlyq qalalardy zertteý men tarıhyn anyqtaýda óz septigin tıgizetin bolady. Qyshqalanyń shyn ataýy áli kúnge deıin belgisiz. El arasynda ony Barshynkent deıtin boljamdar aıtylady.
«Qyshqala ótken ǵasyrdyń 90-shy jyldaryna deıin tarıhshylar nazarynan tys qalyp keldi. Munda ǵylymı negizde zertteý júrgizile qoıǵan joq. Tek áýesqoılyq deńgeıde qazba sharalary jasaldy. Sońǵy jyldarda Qyshqalany zertteýde nátıjeli jumystar qolǵa alynyp otyr», - dedi Qyzylorda oblystyq tarıhı jáne mádenı eskertkishterdi qorǵaý mekemesiniń bólim basshysy Ǵalymjan Sadyqov.
Byltyr bul qalashyqty zertteý barysynda Han shatyryna uqsas ǵımarat orny anyqtalǵan edi.
Bul qasterli meken iri saýda jáne qolóner ortalyǵy bolýy múmkin. Sebebi, atalmysh meken Jibek joly boıynda ornalasqandyqtan sondaı deńgeıge kóterilgen deýge negiz bar. Tabylǵan qysh ydystardyń synyqtary sondaı joramal jasaýǵa negizdeıdi. Osyndaı qaınaǵan tirshilik aýany H-HІ ǵasyrlarda bastalǵan. Ol HІІІ ǵasyrdaǵy Altyn Ordanyń saýda baılanystary órken jaıǵanǵa deıin dáýirlep turǵan.
