Qonaevtaǵy akademııalyq qalashyq qandaı bolady
QONAEV. KAZINFORM — Qonaev qalasynda bilikti de bilimdi mamandardy daıyndaıtyn akademııalyq qalashyq qurylady.
2022 jyly arnaıy akademııalyq qalashyq qurylyp, Almatydaǵy ýnıversıtetterdiń Qonaevqa kóshirilýi múmkin ekeni aıtyldy.
2023 jyly 31 tamyzda Qonaev qalasynda akademııalyq qalashyq salý boıynsha Almaty oblysynyń ákimdigi, Ǵylym jáne joǵarǵy bilim mınıstrligi, Qonayev Academic Campus Fund komertsııalyq emes uıymy úshjaqty memorandýmǵa qol qoıdy.
Osy oraıda Kazinform tilshisi bul jobaǵa qatysy bar jaýapty vedomstvolar men uıymdarǵa habarlasyp, jobanyń qandaı satyda ekenin anyqtady.
Almaty oblysy bilim basqarmasynyń jaýabyna sáıkes, akademqalashyq aýmaǵynda jańa ýnıversıtetter, Almaty qalasyndaǵy joǵary oqý oryndary men kolledjderdiń fılıaldary, ınnovatsııalyq ortalyqtar ashylady dep josparlanǵan.
Munda oqý korpýstary, zerthanalar, ǵylymı-zertteý ortalyqtary, tehnoparkter, jataqhanalar, qonaqúıler jáne bilim berý men áleýmettik ınfraqurylymnyń basqa da nysandary salynyp, jylyna 30 myń stýdent bilim alady.
— Akademqalashyq qurý barysynda oblystyń eldiń áleýmettik-ekonomıkalyq damýynyń basym baǵyttary eskeriledi. Bilim berý baǵdarlamalary kadrlar daıarlaýdy júzege asyrylatyn baǵyttardy eskere otyryp, bakalavrıat, magıstratýra jáne doktorantýra deńgeılerinde júzege asyrylatyn bolady. Bul tásil bolashaqta Almaty qalasynyń joǵary oqý oryndaryna qajetti ınfraqurylym qurylǵannan keıin akademqalashyq qurylymynda bilim berý qyzmetin júzege asyrýǵa múmkindik beredi, — delingen basqarma jaýabynda.
Al Qonayev Academic Campus qorynyń tóraǵasy Janat Rahmanı Almaty oblysynda josparlanǵan joba ınvestorlarmen talqylaý men josparlaý kezeńinen ótip jatqanyn atap ótti.
Jobanyń master-jospary men jobalyq-smetalyq qujattamasy ınvestorlarmen kelisimder tolyq aıaqtalǵannan keıin ázirlene bastaıdy.
— Atalǵan jobanyń qurylys jumystary 2026 jyly bastalyp, aıaqtalýy 2028–2029 jyldarǵa josparlanyp otyr. Jobanyń strategııalyq maqsaty — Qazaqstannyń bilim jáne ǵylym salasyn álemdik deńgeıge kóterý, ǵylymı-ınnovatsııalyq ekojúıe qurý jáne halyqaralyq tehnologııalar transferin qamtamasyz etý. Sondaı-aq bul joba aımaqtyń ǵana emes, búkil eldiń adamı kapıtalynyń sapasyn arttyryp, ǵylymı-tehnologııalyq damýǵa jol ashady, — dedi ol.
Janat Rahmanıdiń aıtýynsha, jobanyń qarjylandyrý kózi — jeke ınvestıtsııalar bolady. Memlekettik bıýdjetten qarajat qarastyrylmaıdy.
Negizgi ınvestor retinde Qytaıdyń birqatar iri kompanııalary qyzyǵýshylyq tanytqan. Tóraǵa olardyń ishinde Qingdao Shangheshi Oil Energy Co. kompanııasynyń belsendiligin atap ótti.
— Josparlanǵan ınvestıtsııanyń jalpy kólemi 900 mln AQSh dollarynan asady. Akademqalashyq Qonaev qalasynyń soltústik-shyǵys bóliginde ornalastyrý kózdelgen. Bul rette 100 gektar jer telimi aldyn ala anyqtalyp, bekitilgen bolatyn, — dedi Qonayev Academic Campus qorynyń tóraǵasy.
Sonymen qatar ol joba tolyq júzege asqanda qalashyqta 3 myńǵa jýyq joǵary bilikti maman — professorlyq-oqytýshy quram men ǵylymı qyzmetkerler eńbek etetin jáne 30 myńnan astam stýdent bolatynyn aıtty.
Odan bólek akademııalyq qalashyqta negizinen sheteldik joǵary oqý oryndarynyń fılıaldaryn ashý kózdelip otyr. Aıtýynsha, qazirgi ýaqytta Túrkııa, Ońtústik Koreıa, Ázirbaıjan jáne t. b. memleketterdiń jetekshi ýnıversıtetterimen aldyn ala kelissózder júrgizilip jatyr.
— Bul óz kezeginde qazaqstandyq jastardyń álemdik deńgeıde sapaly bilim alýyna jáne halyqaralyq deńgeıde ǵylymı-zertteý jumystaryn júrgizýine zor múmkindik beretini sózsiz, — dep túıindedi Janat Rahmanı.
Al agenttik saýalyna jaýap bergen Ǵylym jáne joǵary bilim mınıstrligi akademııalyq qalashyqty qurý tıisti ınfraqurylym tolyq daıyn bolǵanan keıin ǵana múmkin bolatynyn málimdedi.
Mınıstrlik akademııalyq qalashyqqa otandyq joǵary oqý oryndardy, sondaı-aq sheteldik bilim jáne ǵylym uıymdaryn tartý boıynsha usynystardy qarastyrýǵa ashyq.
Eske salaıyq, Memleket basshysy Qasym-Jomart Toqaev Astanada ótken «Connested-2024» halyqaralyq konferentsııasynda Qazaqstan akademııalyq hab quryp jatqanyn aıtty.