Qonaev qalasynyń dızaın kody tanystyryldy

QONAEV. QazAqparat - Almaty oblysynda máslıhat depýtattaryna Qonaev qalysynyń dızaın kody tanystyryldy, dep habarlaıdy QazAqparat tilshisi.

Almaty oblysynyń ákimdigi taratqan málimetke sáıkes, jıynda oblys ákiminiń orynbasary Nurjan Qudaıbergenov aımaqta «Almaty region master plan» JShS qurylǵanyn málimdedi.

«Atalmysh mekeme G4 City-ge kiriktirilgen tórt birdeı qalanyń jobalaý jumysymen aınalysyp jatyr», - dedi Nurjan Qudaıbergenov.

Shahar kelbetine ózindik kórik qosatyn erekshe dızaın úlgisin «Almaty region master plan» JShS dırektory Arsenıı Pırojkov ózi tanystyrdy.

«Biz qalanyń kórkin ashatyn dızaınerlik jumysymyzda eń aldymen buqaraǵa qolaıly jaǵdaı jasaýdy kózdedik. Bala jetektegen ana men múmkindigi shekteýli azamattardyń erkin júrip-turýyna basa nazar aýdardyq, artynsha oblys ortalyǵynyń sáýletiniń kórgen kózge kórkem bolýyn qadaǵaladyq», - dedi Arsenıı Pırojkov.

Onyń dızaındik jobasynda kósheniń qos qaptaly, turǵyn úılerdiń qasbetteri, tipti, saýda oryndarynyń kelbetin ózgertýge qatysty túrli usynystar kórsetilgen. Tek sýburqaq kórinis tappaǵan. Bul týrasynda oblystyq máslıhattyń depýtaty Lazzat Turlashov pikirin ortaǵa saldy.

«Qonaev qalasynyń aýa raıyn barshańyz bilesizder. Jazy óte ystyq. Sol sebepti, sýburqaqtardy ornalastyrǵan abzal. Ekinshi másele, ǵımarat syrtyn retke keltirý kóp shyǵyndy talap etpeýi tıis, osynyń ońtaıly sheshimin taýyp, qazynaǵa túser salmaqty jeńildetetin joldy qarastyrý kerek»,- dedi Lazzat Turlashov.

Jıynǵa qatysqan ózge de depýtattar qala ishinde avtoturaq máselesi men velosıped úshin arnaıy jol ázirleý qajettigin aıtty.

«Jalpy, jańa mártebege ıe bolǵan shahardyń kórinisin kórikti etý úshin áli talaı jumystar atqarylmaq. Jańa qaladan buryn, eskisin retke keltirý jaýaptylar aldynda turǵan úlken mindet. Infraqurylymynan bastap, káriz júıesin jańartýǵa deıingi jumystar kezeń- kezeńimen júzege asady. Barlyq ister bas jospardyń sheńberinde atqarylmaq, dızaın kod naqty bekitilse shahardyń kelbetine ajar qosý jumystary qos qujat arqyly iske aspaq», - dep habarlady oblys ákimdiginiń baspasóz qyzmeti.

Eske salsaq, Memleket basshysy Almaty oblysyndaǵy G4 City qalasyn damytýǵa qatysty tapsyrma bergen bolatyn.

Keıin Úkimet qaýlysymen 2048 jylǵa deıingi kezeńge Almaty oblysynda aýdany 30 myń ga G4 City arnaıy ekonomıkalyq aımaǵy (AEA) quryldy.