Kómirdi jaǵa bermeı, qaıta óńdeý kerek - depýtat
ASTANA. KAZINFORM – Senator Altynbek Nýhuly óziniń depýtattyq saýalynda elimiz kómirdi tereń óńdeý jáne tehnologııalyq ósý múmkindiginen artta qalyp otyrǵanyn málim etti. Osy oraıda kómir hımııasy salasyn damytý qajettigi týraly aıtty.
Senatordyń sózine qaraǵanda, Qazaqstan kómir qory boıynsha álemde 9-orynda turǵanyna qaramastan, búgingi tańda bul resýrstyń az bóligi ǵana tıimdi paıdalanylyp otyr. Qytaı, Germanııa jáne Ońtústik Koreıa sııaqty damyǵan elderde kómir hımııasy ónerkásip saıasatynyń negizgi bóligine aınaldy. Mysaly, Qytaı jyl saıyn tyńaıtqyshtardy, eritkishterdi, nanomaterıaldardy jáne elektronıka bólikterimen birge qosylǵan quny joǵary ónimder úshin kómir óńdeıdi. Qazaqstanda bul salada maqsatty memlekettik saıasat joq, al kómir hımııasy tipti basym ǵylymı baǵyttardyń tizbesine kirmeıdi.
– Kómirden óndiriletin ishki ónim Qazaqstan ekonomıkasyna qosymsha 25-30 mlrd AQSh dollary somasynda ónim ákeledi degen ǵalymdardyń boljamy bar. Kómir hımııasynyń bolashaǵy Qazaqstan úshin óte mańyzdy. Bul baǵyttaǵy jumystardy tıimdi júrgizý úshin sheteldik ozyq tájirıbeler men tehnologııalardy tartý, ǵylymı zertteýlerdi kúsheıtý, osy salany qarqyndy damytý elimizge qomaqty ınvestıtsııa ákelýi de ábden múmkin, - dedi Altynbek Nýhuly Senattyń jalpy otyrysynda.
Depýtat 2026-2035 jyldarǵa arnalǵan kómir hımııasyn damytý jónindegi memlekettik baǵdarlama ázirleýdi, tıisti zań jobasyn daıyndaýdy jáne kómir hımııasy klasterlerin qurý jónindegi jol kartasyn bekitýdi usyndy.
Sonymen qatar senator «Kómir men quramynda kómirtegi bar shıkizat pen qaldyqtardy keshendi qaıta óńdeý» taqyrybyn Úkimet janyndaǵy Joǵary ǵylymı-tehnıkalyq komıssııanyń basym ǵylymı baǵyttarynyń tizbesine engizýdi usyndy.
Monymen qosa ol kómir hımııasy boıynsha Ulttyq ǵylymı-ınnovatsııalyq ortalyq qurý, sondaı-aq bilim berý baǵdarlamalaryn engizý jáne «Bolashaq» baǵdarlamasy aıasynda osy mamandyq boıynsha oqýǵa kvota bólý jóninde bastama kóterdi.
Buǵan deıin habarlanǵandaı, kómir óndirisiniń jańa tehnıkalyq reglamenti bekitildi.