Kómir óndirisiniń jańa tehnıkalyq reglamenti bekitildi
ASTANA. KAZINFORM — Kómir men óńdeý ónimderine qoıylatyn talaptar boıynsha jańa tehnıkalyq reglament bekitildi, dep habarlaıdy Tehnıkalyq retteý jáne metrologııa komıteti.
Qazaqstan Respýblıkasynda 2025 jylǵy 11 naýryzdaǵy № 84 Qazaqstan Respýblıkasy Ónerkásip jáne qurylys mınıstriniń buıryǵymen «Kómir men óńdeý ónimderine qoıylatyn talaptar» tehnıkalyq reglamenti bekitildi. Buıryq alǵash resmı jarııalanǵan kúnnen bastap on eki aı ótken soń kúshine enedi.
Tehnıkalyq reglamenttiń tehnıkalyq retteý obektileri mynalar:
1) kómir jáne olardy suryptaý, baıytý jáne aglomeratsııalaý ónimderi;
2) kómirdi termohımııalyq óńdeý ónimderi (koks, jartylaı koks, tas kómir shaıyry, kómir maıy, qazandyqqa arnalǵan kómir otyny, belsendirilgen kómir).
Komıtet atap ótkendeı, jańa tehnıkalyq reglamentte kómirdiń jáne óńdeý ónimderiniń túrleri naqty kórsetilgen, sáıkestikti baǵalaý bólimi tolyqtyrylǵan.
— Kómir men onyń óńdeý ónimderin óndirý protsesterine qoıylatyn talaptar alynyp tastaldy, óıtkeni olar salalyq quqyqtyq aktilermen retteledi. Jalpylama qaýipsizdik normalarynyń ornyna ártúrli kómir túrleri men onyń óńdeý ónimderine arnalǵan qaýipsizdik kórsetkishterin saralanǵan normalaý engizildi. Mysaly, tehnıkalyq reglament talaptaryna tas kómirden alynatyn koks pen jartylaı koks, belsendirilgen kómir jáne Eýrazııalyq ekonomıkalyq odaqtyń syrtqy ekonomıkalyq qyzmetiniń biryńǵaı taýar nomenklatýrasyna sáıkes kodtary bar basqa da ónimder endi. Kómirdi termohımııalyq óńdeý ónimderiniń saqtaý merzimine qatysty normalar engizildi, sondaı-aq ónimniń órt qaýipsizdigin sıpattaıtyn normalar belgilendi, — delingen vedomstvo taratqan aqparatta.
Tehnıkalyq reglamenttiń jańa redaktsııasyna tehnıkalyq reglament talaptaryn saqtaý úshin qajetti 52 standartty jáne kómir men óńdeý ónimderiniń sáıkestigin baǵalaý úshin 116 standartty qamtıtyn standarttar tizbesi ázirlendi.
Osy tehnıkalyq reglament kúshine engenge deıin Qazaqstan Respýblıkasy Úkimetiniń 2010 jylǵy 17 shildedegi № 731 qaýlysymen bekitilgen «Kómirdiń jáne ony óndirý, óńdeý, saqtaý jáne tasymaldaý protsesteriniń qaýipsizdigine qoıylatyn talaptar» tehnıkalyq reglamenti qoldanylady. Jańa tehnıkalyq reglament kúshine engen sátten bastap bul qujattyń kúshi joıylady.
Budan buryn elimizdiń qoımalarynda qansha kómir bar ekeni naqtylandy.