Kommýnaldyq tarıfter ózgeredi – Ulttyq ekonomıka mınıstri

ASTANA. KAZINFORM – Qazaqstanda barlyq kommýnaldyq qyzmet boıynsha tarıf ósedi. Bul týraly QR Ulttyq ekonomıka mınıstri Álibek Qýantyrov aıtyp berdi.

«Sý boıynsha tarıf óte tómen. Ótken jyly BQO-ǵa barǵanymda bir tekshe sý 44 teńge bolǵan. Árıne, sýdy tıimsiz paıdalaný bolady. Eger monshaǵa barsańyz sýdyń aǵyl-tegil tógilip jatqanyn kóresiz. Sý – eń mańyzdy resýrs, sondyqtan ony únemdeý kerek. Tarıf ósedi. Qazir sý boıynsha 200-500 teńge tólenedi, munda agressıvti túrde kóterýge bolady. Áıtpese, esh únemdeý bolmaıdy», - dedi Álibek Qýantyrov Úkimet úıinde ótken baspasóz máslıhatynda.

Mınıstrdiń aıtýynsha, tarıfter jyl saıyn túzetilip otyrady, óıtkeni tarıftik baǵdarlama jeti jylǵa sozylady.

«Munda bári birtindep jasalady, halyq pen bıznes úırenip, ınflıatsııaǵa sáıkes kelýi kerek. Merdigerler men qurylys uıymdary fızıkalyq turǵydan bárin jańarta alýy qajet. Bul negizinen sýmen jabdyqtaý, sý burý úshin jasalady. Kóshe jumystary sekildi maýsymdyq jumystardy qysta júrgizý qıyn. Ortasha alǵanda, keıbir sýbektiler men TKSh túrleri boıynsha tarıfter 10-15% ósýi múmkin. Belgili bir shekten asyrmaýǵa tyrysamyz. Áıtpese, áldeqaıda joǵary ósim bolar edi. Tek ınflıatsııany ustap turý kerek», - dep túsindirdi ol.

Tarıftiń ósýi barlyq qyzmet túrlerin qamtıdy, óıtkeni barlyq ınfraqurylymnyń tozýy baıqalady.

«Ásirese káriz júıesi qatty tozǵan, al tólenetin aqysy óte az. Ortasha alǵanda, eki bólmeli páter káriz úshin 200 teńge tóleıdi. Muny kóterý kerek. Tarıftiń jalpy ósýiniń qaltaǵa salmaq salmaýyn da eskeremiz. Sonymen qatar, bıyl taǵy 40 myń otbasyna tarıfterdiń ósýi úshin ótemaqy tóleý josparlanýda. Buryn tarıfter otbasy tabysynyń 20%-dan astamyna jetse, ótemaqy beriletin. Qazir bul shek 10%-ǵa deıin tómendetildi. ıAǵnı kóbirek otbasyny qamtımyz», - dedi Á. Qýantyrov.