Kómir baǵasyna deldaldar qalaı yqpal etip júr

ASTANA. QazAqparat - Kómir baǵasy deldaldar arqyly jasandy túrde kóteriledi. Bul týraly «Úkimet úıinde» ótken baspasóz máslıhatynda «QTJ» UK» AQ atqarýshy dırektory - «Júk tasymaly» AQ basqarma tóraǵasynyń mindetin atqarýshy Qaırat Saýyrbaev málim etti, dep habarlaıdy QazAqparat.

 «Jylý berý maýsymy qarsańynda kómir naryǵynda baǵanyń deńgeıin jasandy túrde ósirý baıqalady. Birinshi kezekte bul jaǵdaı kómir óndirýshileri men tutynýshylary arasynda birqatar deldal uıymdardyń bolýyna baılanysty. Biz olardyń is-qımyldaryna yqpal ete almaımyz», - dep toqtaldy Q. Saýyrbaev.

Onyń sózine qaraǵanda, bıylǵy 7 aıda kompanııa 56 mln tonna kómirdi tasyp úlgerdi jáne bul kórsetkish ótken jylǵy sáıkes kezeńinen artyqtaý. Kommýnaldyq-turmystyq qajettilikter boıynsha tutynýshylar úshin 4,5 mln tonna kómir jetkizilip, byltyrǵa qaraǵanda 10 paıyzǵa joǵary boldy.

 Jyl sońyna deıin 106,5 mln tonna kómir tasymaldaý josparlanyp otyr. Onyń ishinde qazaqstandyq tutynýshylarǵa 75,9 mln tonna jetkizilmek.

Q. Saýyrbaevtyń aıtýynsha, kompanııada atalǵan júkke arnalǵan 54 myń ashyq vagon bar, sonyń 29 myńy kómir tasymalyna jumyldyrylǵan. Sáıkesinshe, bul kórsetkish byltyrmen salystyrǵanda 4 myń vagonǵa artyq. Kommýnaldyq-turmystyq kómirdi tasymaldaýǵa 9 myńnan astam ashyq vagon tartyldy. Jyljymaly quramnyń tapshylyǵyn boldyrmaý maqsatynda  ashyq vagondardy kómir razrezderine bekitý sharalary iske asyryldy.