Kómir baǵasy byltyrdan beri qymbattaǵan joq - mınıstrlik

ASTANA. QazAqparat - Indýstrııa jáne ınfraqurylymdyq damý mınıstri Qaıyrbek Óskenbaev Respýblıkalyq taý-ken óndirýshi jáne taý-ken metallýrgııalyq kásiporyndar qaýymdastyǵynyń atqarýshy dırektory Nıkolaı Radostovetspen kezdesti, dep habarlaıdy QazAqparat.

Kezdesý barysynda taraptar kómir óndirisin jańǵyrtý men salaǵa jańa tehnologııalar engizýge baǵyttalǵan máselelerdi talqylady. Sonymen qatar qatty otyn tasymalyn utymdy uıymdastyrý men onyń baǵasynyń negizsiz ósýin tejeý jáne ınvestıtsııalar tartý boıynsha birlese jumys isteýge ýaǵdalasty.

Búginde elimizde kómir óndiretin 25-ǵa jýyq kásiporyn bar. Atalǵan óndiris oshaqtary bıylǵy segiz aıda 73,7 mln tonna kómir óndirgen. 2022-2023 jyldardaǵy jylytý maýsymynyń basynan beri kommýnaldyq-turmystyq sektor men halyqqa arnalǵan 4,03 mln tonna qatty otyn jetkizildi. Bul ótken jylǵy kórsetkishpen salystyrǵanda 4,6 paıyzǵa artyq.

Kómir salasyndaǵy kompanııalardyń málimeti boıynsha, otynnyń bul túriniń baǵasy ótken jylǵy deńgeıde. Máselen, qazirgi tańda ishki naryqta kómirdiń ár tonnasy 8 myń men 21 myń 600 teńge aralyǵynda satylýda. Onyń quny ken ornynyń qashyqtyǵy men kómirdiń markasyna tikeleı baılanysty.

Indýstrııa jáne ınfraqurylymdyq damý mınıstrligi kómir baǵasynyń negizsiz ósýine jol bermeý maqsatynda «QazTemirTrans» AQ vagondar jelisi arqyly ken oryndarynan tikeleı tasymaldaýdy uıymdastyrýda.

Budan bólek, IIDM kómirdi elden tys aımaqtarǵa avtokólikpen shyǵarýǵa tyıym salý týraly arnaıy buıryq shyǵardy. Mınıstrliktiń bul sheshimi jergilikti kómir tıeý tuıyqtary men óńir ákimdikterimen birlesip ázirlengen. Basty maqsat – 2022-2023 jyldaryndaǵy jylý berý maýsymy kezeńinde kózdelgen mejeni oryndaý jáne eldegi kómir tapshylyǵyn boldyrmaý.