Qolónerge qadam basýyma erekshe balam sebep boldy – monshaqtan sómke jasaıtyn áıel
ÓSKEMEN. KAZINFORM – Erekshe qajettilikteri bar balasy dúnıege kelgende saǵyn syndyrmaı, emine aqsha izdegen Nargıza Aqybaeva qolónermen aınalysty. Onyń merýert monshaqtan jasaıtyn kózdiń jaýyn alatyn sómkeleri men ár alýan áshekeılerine suranys kóp. Osymen shektelmeı alda qobdıshalar da jasap kórip, dúken ashýdy josparlap otyr. Qamkóńil ana satylymnan túsken aqshany baýyr eti balasynyń otasyna jınap jatyr.
«Ulym osydan tórt jyl buryn jaryq dúnıe esigin ashqan. Tserebraldy sal aýrýyna shaldyqqan balam júre de, otyra da almaıdy. Onyń emine, kún saıynǵy ońaltýǵa kóp aqsha ketedi. Kúıeýim birneshe jerde jumys istese de, tapqany jetpedi. Sondyqtan ózim de eńbek etýge bel baıladym», - deıdi Nargıza Aqybaeva.
Sóıtip ol qolónermen aınalysa bastaǵan. Negizgi mamandyǵy dızaıner bolǵandyqtan ár túrli buıymdardy sándep jasaýdy urshyqsha ıirip áketti.
«Balam eki jasqa tolǵansha aýrýhanadan aýrýhanaǵa shapqylaýmen boldym. Psıhıkalyq turǵyda da óte aýyr boldy. Birde áleýmettik jeli arqyly erekshe balalary bar analardyń klýby týraly kórip qaldym. Habarlasyp, kezdesýge jazyldym. Olar arnaıy kýrstan ótýdi usyndy. Sonyń arqasynda balama memleketten qandaı kómekter tıesili ekendigin bildim. Buryn ulymnyń dıagnozyn jasyratyn edim. Al osy kýrstan soń qoryqpaı ashyq aıtatyn boldym. Bir sózben aıtqanda ózimdi taptym. Sodan baryp tabys kózin izdeýge kóship, qolónerge qadam bastym. Internetten merýert monshaqtan sómkeler jasaýdyń kýrstaryn kórip, ádis-tásilderin úırendim», - deıdi Nargıza.
Qandaı materıaldar kerektigin, jasaý tehnıkasyn meńgerip qolyn shyńdaı berdi. Eń alǵashqy sómkesin 2 jarym aptada jasap shyqqan. Ýaqyt ótken saıyn tájirıbe jınaqtap, jyldamdyqty arttyra tústi. Qazir bir sómkeni kem degende 3-4 kúnde jasap shyǵarady.
«Kúndiz múlde ýaqytym bolmaıdy. Jumysqa tek túnde otyramyn. Sómkeden basqa moıynǵa taǵatyn áshekeı, kóılektiń ústinen kıetin top jasaımyn. Áleýmettik jeli arqyly satylymǵa shyǵaramyn. Túrli kórmelerge de qatysamyn. Tapsyrys beretinder sany artyp keledi. Ásirese kishkentaı sómkelerge qyzyǵatyndar kóp. Ol kıimmen jaqsy úılesip, obrazyńyzdy ashady. Aldaǵy ýaqytta qobdısha jasaýdy qolǵa alǵym keledi. Іshine qyzdar zergerlik buıymdaryn saqtaıdy», - deıdi qolónershi.
Taıaýda Óskemende qaıyrymdylyq aýktsıony ótip, oǵan Nargıza Aqybaevanyń sómkeleri shyǵarylǵan. Kásipkerler men jomart jandar biraz sómkeni satyp aldy. Mamyr aıynda balasynyń otasyna qajetti aqshanyń jartysy sol aýktsıonda jınalǵan.
«Maǵan áleýmettik jelige qyzdardan, jas analardan «osylaı sómke jasaýdy úıretińizshi» degen habarlamalar jıi keledi. Soǵan oraı bolashaqta kýrs ashýdy josparlap otyrmyn. Odan keıin tek jelide saýdalaýmen shektelmeı, sátin salsa, dúken ashqym da keledi», - deıdi ol.
