Kollektorlyq agenttikter zańǵa qaıshy áreket etken
«Ulttyq Bankke qaryz alýshylardan kollektorlardyń zańsyz is-qımyldaryna qatysty ótinishter túsýde. Negizgi shaǵymdar boryshkermen Zańnyń 5-babynda aıqyndalǵan ózara is-qımyl tártibin buzýǵa qatysty. 2018 jyldyń II toqsanynda ótinishterdi qaraý qorytyndysy boıynsha 5 (bes) kollektorlyq agenttik - «Delta M Qazaqstan» kollektorlyq agenttigi», «Ekspert Plıýs» kollektorlyq agenttigi» JShS, «Ulttyq óndirip alý qyzmeti» kollektorlyq agenttigi» JShS, «PARITET» kollektorlyq agenttigi» JShS men «Legal Collection» kollektorlyq agenttigi» JShS shekteýli yqpal etý túrinde jazbasha uıǵarym jasaldy», - delingen banktiń resmı habarlamasynda.
Solardyń ishinde «Delta M Qazaqstan» kollektorlyq agenttigi, «Ekspert Plıýs» kollektorlyq agenttigi» JShS men «Ulttyq óndirip alý qyzmeti» kollektorlyq agenttigi» JShS boryshkermen ózara is-qımyl jasaý kezinde adal emes is-áreketterge barǵan.
Zańǵa sáıkes, kollektorlyq agenttik boryshkermen kollektorlyq agenttiktiń (fılıalynyń, ókildiginiń) ornalasqan jeri boıynsha úı-jaılaryndaǵy aýdıo nemese beınetehnıka quraldarynyń kómegimen ózara is-qımyl jasaý barysyn tirkeýge, aýdıo jáne (nemese) beınejazba materıaldaryn boryshkermen jáne (nemese) onyń ókilimen ózara is-áreket jasaǵan kúnnen bastap alty aı ishinde saqtaýǵa mindetti.
«PARITET» kollektorlyq agenttigi» JShS osy tarmaqty buzǵan. Budan bólek, boryshkermen alǵashqy baılanys jasaý kezinde barlyq qajetti aqparat, atap aıtqanda kollektorlyq agenttiktiń ataýy, kollektorlyq agenttikter tizilimindegi eseptik tirkeý nómiri, boryshkermen ózara áreket jasaıtyn adamnyń tegi, aty, ákesiniń aty (eger ol jeke basty kýálandyratyn qujatta kórsetilse) jáne laýazymy kórsetilýi tıis. «Delta M Qazaqstan» kollektorlyq agenttigi», «Ekspert Plıýs» kollektorlyq agenttigi» JShS jáne «Legal Collection» kollektorlyq agenttigi» JShS atalǵan talapty oryndamady.
Zań boıynsha kollektorlyq agenttikke ózara is-qımyl jasasatyn tulǵanyń ar-namysyna, qadir-qasıetine jáne iskerlik bedeline nuqsan keltiretin málimetterdi taratýǵa tyıym salynǵan. Budan bólek, adamnyń ómiri men densaýlyǵyna qater tóndiretin, sondaı-aq osy tulǵaǵa múliktik jáne ózge de zııan keltirýge alyp keletin, quqyqqa qaıshy áreketterge jol berilmeıdi. Boryshkerge jáne onyń ókiline, ıa bolmasa, úshinshi tulǵalarǵa kúsh qoldanýǵa, olardyń múlkin búldirýge, qysym jasaýǵa bolmaıdy.
Aıta keteıik, Ulttyq banktiń «QUB «Online» mobıldi qosymshasynda «Kollektorlyq agenttikterdiń qyzmeti» atty jańa bólim ashylǵan. Sol jerde kollektorlyq agenttiktermen ózara is-qımyl jasaý tártibi týraly tolyq aqparat bar. Al banktiń resmı saıtynda kollektorlyq agenttikterdiń tizimin kórýge bolady. 2018 jyldyń 10 shildesine deıin respýblıka boıynsha 104 kollektorlyq agenttik resmı tirkeýden ótti. Barlyq aryz-shaǵymdardy tikeleı Ulttyq bank joldaýǵa bolady.
