Kolledjde AI Lab+ jasandy ıntellekt zerthanasy ashyldy
ASTANA. KAZINFORM — APEC PetroTechnic joǵary kolledji bazasynda AI Lab+ jasandy ıntellekt zerthanasy iske qosyldy. Bul týraly Oqý-aǵartý mınıstrliginiń baspasóz qyzmeti habarlady.
Jańa bilim berý alańy Qazaqstanda tsıfrlyq tehnologııalar men jasandy ıntellektti damytýǵa baǵyttalǵan memlekettik saıasattyń mańyzdy qadamyna aınaldy.
Memleket basshysy Qasym-Jomart Toqaev 2026 jyldy tsıfrlyq tehnologııalar men jasandy ıntellektti damytýǵa basymdyq beriletin kezeń retinde aıqyndap, bul baǵyttyń el ekonomıkasy men tehnologııalyq ilgerileýindegi strategııalyq mańyzyn atap ótken bolatyn.
AI Lab+ zerthanasynyń ashylýy Qazaqstan men Qytaı arasyndaǵy bilim berý salasyndaǵy yntymaqtastyqtyń naqty nátıjesi boldy. Qazirgi ýaqytta eki el arasynda stýdentter almasý, birlesken ǵylymı jobalardy júzege asyrý, sondaı-aq «Tsıfrlyq Jibek joly» baǵytynda bastamalardy damytý boıynsha júıeli jumystar júrgizilip keledi.
AI Lab+ zerthanasy stýdentterdiń jasandy ıntellekt, robototehnıka, kompıýterlik kórý jáne basqa da tsıfrlyq tehnologııalar salalaryndaǵy praktıkalyq daǵdylaryn damytýǵa baǵyttalǵan. Munda bilim alýshylar óndiristik ortaǵa barynsha jaqyn jaǵdaıda tájirıbe jınaqtaı alady.
Zerthana birneshe zamanaýı oqý-zerthanalyq keshendermen jabdyqtalǵan. Atap aıtqanda, jasandy ıntellekt qurylǵylaryna arnalǵan keshen stýdentterge beıne men dybysty taný, sondaı-aq «aqyldy kampýs» júıelerin ázirleýdi meńgerýge múmkindik beredi. Al robottalǵan baqylaý kesheni óndiristik protsesterdi modeldeýge jaǵdaı jasaıdy. Sonymen qatar, ROS negizindegi avtonomdy kólik platformasy mobıldi robottar men avtonomdy basqarý júıelerin tájirıbe júzinde zertteýge jol ashady.
AI Lab+ zerthanasy stýdentter úshin ǵylymı-zertteý jáne qoldanbaly jobalardy iske asyratyn tıimdi alańǵa aınalyp, elimizdiń tsıfrlyq transformatsııasyna úles qospaq.
Eske salsaq oqý baǵdarlamalarynyń jáne oqýlyqtardyń mazmuny qaıta qaralatyny týraly jazǵan edik.