Kolledj stýdentteriniń stıpendııasy taǵy 50 paıyzǵa ósedi

ASTANA. KAZINFORM – 1 qyrkúıekten bastap kolledj stýdentteriniń shákirtaqysy 43 myń teńgege artady. Bul týraly Oqý-aǵartý mınıstri Ǵanı Beısembaev málim etti.

«Memleket basshysynyń tapsyrmasy boıynsha tehnıkalyq jáne kásiptik bilim berý júıesinde memlekettik tapsyrysty ulǵaıtý boıynsha jumystar belsendi júrgizilip otyr. Bıyl 145 myń grant bólindi, onyń 65%-y tehnıkalyq mamandyqtarǵa baǵyttalǵan. Sondaı- aq, 1 qyrkúıekten bastap kolledj stýdentteriniń stıpendııasy ótken jylǵy deńgeıden 50%-ǵa ulǵaıady», - dedi Ǵanı Beısembaev Úkimet otyrysynda. 

Mınıstrdiń málimdeýinshe, bıyl birinshi jartyjyldyqta 104 kolledjdiń materıaldyq-tehnıkalyq bazasy jaqsarǵan. 

«Tehnıkalyq bazanyń zamanaýı standarttarǵa saı bolýy jáne stýdentterdi oqytý men pedagogterdiń jumysy úshin qolaıly jaǵdaılardy qamtamasyz etýi mańyzdy. Bıyl 2 103 orynǵa arnalǵan 8 jataqhana salynyp jatyr. Qazir Pavlodar jáne Túrkistan oblysynda 259 orynǵa arnalǵan 2 jataqhana paıdalanýǵa berildi. Taldaý nátıjeleri keıbir óńirlerde stýdentterdi jataqhanalarmen qamtamasyz etý máselesi áli de mańyzdy ekenin kórsetip otyr. Bul Almaty qalasy (2 349 tósek-oryn), Astana (1 291), Aqmola oblysy (1 112), SQO (811) jáne Almaty (711) oblysynda tapshylyq bar», - deıdi ol.