Kolledj stýdentterine 11 jańa jataqhana salynady

ASTANA. KAZINFORM – Tehnıkalyq jáne kásiptik bilim departamentiniń aqparaty boıynsha bıyl kolledj stýdentteri úshin 2,6 myńnan astam tósek-orynǵa arnalǵan taǵy 11 jańa jataqhana ashý josparlanǵan. Bul týraly QR Oqý-aǵartý mınıstrligi málim etti. 

 

Bul sharalar oqytýdyń tabysty protsesin qamtamasyz etý ári tehnıkalyq jáne kásiptik bilim berý sapasyn arttyrýǵa baǵyttalyp otyr. 

«Kolledj stýdentteriniń ómir súrý jaǵdaıyn jaqsartýǵa erekshe nazar aýdarylady. Ótken jyly ǵana elimizdiń toǵyz óńirinde 2,5 myńnan astam oryndyq 13 jataqhana ashyldy. Biz bul jumysty jalǵastyrýdy josparlap otyrmyz. Bıyl Aqmola, Almaty, Soltústik Qazaqstan jáne Pavlodar oblystarynda taǵy 11 jańa jataqhana iske qosylady. Qazirgi tańda olardyń qurylysyna ınvestorlar tartylyp jatyr», - dep atap ótti departament dırektory Áset Muhanbetov.

Qazir Qazaqstandaǵy kolledj stýdentteriniń 87%-dan astamy jataqhanada turý múmkindigine ıe.