Kólik mınıstrligi Almaty mańynda qańtarylyp turǵan júzdegen avtobýsqa túsinik berdi
Kólik mınıstrligi azamattyq belsendi Sanjan Boqaevtyń Almaty irgesindegi kólik qoımalarynyń birinde qańtarylyp turǵan júzdegen avtobýs týraly rezonansty vıdeosyna túsinik berdi, dep habarlaıdy QazAqparat tilshisi.
Mınıstrliktiń QazAqparat tilshisiniń saýalyna joldaǵan jaýabynda qoımada turǵan 823 kóliktiń 651-i shynymen de jaramsyz retinde esepten shyǵarylǵany aıtylǵan.
Biraq onyń ishinde 4 avtobýs qana 2017-2018 jyldary satyp alynǵan.
Qalǵany 2010-2013 jyldar aralyǵynda shyǵarlyǵan qytaılyq atobýstar ekeni baıandalǵan.
«Almaty qalasy qalalyq utqyrlyq basqarmasynyń resmı aqparaty boıynsha Jetigen kentindegi „Almatyelektrotrans“ JShS kólik quraldary qoımasynyń aýmaǵynda ornalasqan avtobýstarǵa qatysty mynany habarlaımyz. Qoıma aýmaǵynda 823 kólik ornalasqan, onyń ishinde 651 kólik quraly paıdalanýǵa jatpaıdy (esepten shyǵarýǵa jatady)» delingen jaýapta.
Esepten shyǵarylatyn avtobýstar:
— Yutong markaly 598 avtobýs (2010-2013 jyly shyǵarylǵan).
— King long (2013 jyly shyqqan) markaly 4 avtobýs.
— 4 LIAZ markaly avtobýs (2017-2018 jyly shyǵarylǵan).
— PAZ (2013 jyly shyqqan) markaly 10 avtobýs.
— 1 Gazel markaly avtobýs (2016-2017 jyly shyǵarylǵan).
— Youngman (2008-2013 jyly shyǵarylǵan) markaly 34 trolleıbýs.
Mınıstrlik málimeti boıynsha, qalǵan 172 avtobýs qoǵamdyq tasymalǵa jaramdy.
Onyń ishinde LıAZ markaly, 18 metrlik 15 avtobýs (2017-2018 jyly shyǵarylǵan) ýaqytsha saqtaýǵa qoıylǵan jáne esepten shyǵarylmaǵan.
Qalǵany Almaty oblysyna berilýi kerek bolǵan.
«157 kólik Almaty oblysynyń ákimdigine berildi (Almaty qalasy ákiminiń 2022 jylǵy 22 qazandaǵy № 4/547 qaýlysyna sáıkes), olardy Almaty oblysynyń ókilderi áketpegen. Onyń ishinde Gazel markaly 38 avtobýs, PAZ markaly 5 avtobýs, LIAZ markaly 114 avtobýs bar. Osylaısha, 2017-2018 jyldary shyǵarylǵan avtobýstar esepten shyǵarylǵan joq. Olar Almaty oblysynyń ákimdigine odan ári berý úshin ýaqytsha saqtaýda tur», — dep jazady mınıstrlik mamandary.
Vedomstvonyń resmı jaýabynda belsendi Sanjar Boqaev keltirgen avtobýstardy satyp alý kezinde baǵasy qoldan ósirip kórsetilgeni jáne qoǵamdyq tasymal sýbsıdııasynyń mólsheri shekten tys asyryp belgilengeni týraly málimetterdi tekserý mınıstrlik quzyretine jatpaıtyny aıtylǵan.
Eske sala keteıik, shilde aıynda áleýmettik jeli qoldanýshylary Almaty turǵyny jarııalaǵan fotosýretterge qarap, narazylyq bildirgen bolatyn.
Keıin sol kezdegi Indýstrııa jáne ınfraqurylymdyq damý mınıstri Marat Qarabaev Almaty qalasynyń mańynda qańtarylyp turǵan 300 avtobýsqa pikir bildirdi.
Posmotret etý pýblıkatsııý v Instagram
