Kólikke adam baılap súıregen: Pavlodar polıtsııasy mán-jaıdy anyqtady

PAVLODAR. QazAqparat – Adamdy kóliktiń artyna baılap súırep bara jatqan vıdeo áleýmettik jelide taraǵan. Osyǵan baılanysty Pavlodar polıtseıleri mán-jaıdy anyqtap, arnaıy túsinikteme berdi, dep habarlaıdy QazAqparat Polisia.kz saıtyna silteme jasap.

Polıtseıler jan shoshyrlyq vıdeony áleýmettik jelilerge monıtorıng kezinde Telegram-kanaldardyń birinen baıqaǵan.

«Atalǵan vıdeo boıynsha tekseris júrgizildi. Atap aıtqanda, 11 mamyrda áleýmettik jelilerdi monıtorıngileý kezinde tártip saqshylary Pavlodar qalasynda Nazarbaev dańǵyly men Tolstoı kóshesiniń qıylysynda túsirilgen vıdeony anyqtady. Onda avtokólik adamǵa uqsaıtyn áldeneni súırep bara jatqany kórinedi. Bul fakti Pavlodar qalasynyń Polıtsııa basqarmasynda tirkeldi. Anyqtalǵandaı, vıdeo 2019 jyly Pavlodarda «AFA» fılminiń túsirilimi kezinde jasalǵan. Avtokólikke adamnyń manekeni baılanǵan. Fılmdi túsirý kezinde eshkim zardap shekken joq», – dep habarlady Pavlodar oblysy Polıtsııa departamenti bastyǵynyń birinshi orynbasary Jasqaırat Qaıyrov.

Eske salaıyq, Pavlodarda «artyna adamdy baılap, súırep bara jatqan» kólik týraly vıdeo taraǵanyn buǵan deıin jazǵan bolatynbyz.

Polıtsııa atalǵan faktige qatysy bar tulǵalar men kýágerlerdi anyqtaýǵa birden kiristi. Sondaı-aq oblystyq Polıtsııa departamenti vıdeony túsirgen kýágerlerden «102» nemese 87774586688 nómirine habarlasýdy surady. Qupııalylyq saqtalatynyna kepildik berildi.