Qolǵapty aýystyrmaǵan: Aqtóbede ata-analar shaǵymy tekserilip jatyr
AQTÓBE. KAZINFORM – Aqtóbede ata-analar balalaryn mekteptiń májilis zalyna jınap, medıtsınalyq tekserýden ótkizgen ujymnyń áreketin synǵa aldy. Qazir qyzmettik tekserý bastaldy.
Aqtóbedegi №14 mektepte medıtsınalyq tekserý júrgizildi. Ata-analardyń málimetine súıensek, tekserý májilis zalynda ótken. Er balalardy jynys múshesin tekserý kezinde dárigerler rezeńke qolǵapty aýystyrmaǵan, sonymen birge qyzdardy da er dáriger qarap shyqqan.
Osy oqıǵadan keıin Aqtóbe oblystyq densaýlyq saqtaý basqarmasy qyzmettik tekserý bastalǵanyn habarlady.
- 5 aqpan kúni №14 mektepte medıtsınalyq tekserý júrdi. Medıtsınalyq tekserýdiń bolatyny týraly aldyn ala habar berildi, ata-analary da biledi. Al medıtsınalyq tekserýge arnalǵan oryndy mektep ákimshiligi belgiledi. №14 orta mektepte 3, 4 jáne 8 synyptyń 98 oqýshysy tekserildi. Tekserý júrgizgender arasynda balalar hırýrgi de boldy. Mamannyń aıtýynsha, ár balany qaraǵan kezde medıtsınalyq qolǵapty aýystyryp otyrǵan. Aıtyp óteıik, medıtsınalyq tekserýge qajetti qolǵap pen zararsyzdandyrý quryldary bar, dárigerler qajetti zattarmen qamtylǵan. Osy oqıǵadan soń oblystyq densaýlyq saqtaý basqarmasynda ishki tekserý bastaldy. Onyń qorytyndysy týraly ata-analarǵa jazbasha habarlanady, - dep habarady oblystyq densaýlyq saqtaý basqarmasynyń baspasóz qyzmeti.
Aıta keteıik, mundaı medtsınalyq tekserý kezinde balalardan qan almaıdy, qandaı da bir vırýs juqtyrý qaýpi meılinshe tómen. Arnaıy bólmeni de talap etpeıdi. Tek balalar úshin bólmeniń aýa temperatýrasy qalypty bolýy tıis.
- Medıtsınalyq baqylaýdan ótý kestesi «Aqtóbe qalasynyń bilim bólimi» MM-men kelisiledi. Mektep tarapy medıtsınalyq baqylaý júrgizetin oryndy qamtamasyz etip, ata-analardy habardar etedi. Al medıtsınalyq komıssııa men baqylaýdyń sapasyna medıtsınalyq mekeme jaýapty,- dep habarlady Aqtóbe qalalyq bilim bóliminiń basshysy Latyp Álibı.
Buǵan deıin habarlaǵanymyzdaı, Muǵaljar aýdanyndaǵy Samal bóbekjaı-baqshasyndaǵy balalardyń tańǵy asynan qońyz tabyldy.