Qoldanystaǵy Konstıtýtsııanyń 25 babyna 32 túzetý engizildi
Qazaqstan Respýblıkasy óz táýelsizdigin jarııalaǵan alǵashqy kúnnen bastap-aq, ózin zaıyrly ári quqyqtyq demokratııalyq memleket ekendigin barsha álemge pash etti. Osy oraıda, bizdiń Ata zańymyz, ıaǵnı Qazaqstan Respýblıkasynyń Konstıtýtsııasynyń mańyzdy rólin erekshe aıtýymyz kerek.
Qazaqstan Respýblıkasynyń Konstıtýtsııasy 1995 j. 30 tamyzda Respýblıkalyq referendým ótkizý, ıaǵnı búkil halyqtyq daýys berý jolymen qabyldandy. Konstıtýtsııany qabyldaı otyryp, Qazaqstan halqy memlekettik bıliktiń qaınar kózi - óziniń egemendik quqyǵyn baıandy etti.
QR Konstıtýtsııasynyń kirispesinde Ata zańdy qabyldaýdyń sebepteri men maqsattary kelesideı mátinde túsindirilgen:
«Biz, ortaq tarıhı taǵdyr biriktirgen Qazaqstan halqy, baıyrǵy qazaq jerinde memlekettilik qura otyryp, ózimizdi erkindik, teńdik jáne tatýlyq murattaryna berilgen beıbitshil azamattyq qoǵam dep uǵyna otyryp, dúnıejúzilik qoǵamdastyqta laıyqty oryn alýdy tileı otyryp, qazirgi jáne bolashaq urpaqtar aldyndaǵy tarıhı jaýapkershiligimizdi sezine otyryp, ózimizdiń egemendik quqyǵymyzdy negizge ala otyryp, osy Konstıtýtsııany qabyldaımyz».
Ata zańnyń bul bóligi saıası jáne ıdeologııalyq turǵydan alǵanda asa mańyzdy. Sebebi, bul elimizde demokratııalyq, zaıyrly, quqyqtyq jáne áleýmettik memleket qurýdyń konstıtýtsııalyq negizin qalady. Osydan kelip, tómendegideı negizgi maqsat týyndaıdy: óziniń eń qymbat qazynasy retinde adamdy jáne onyń ómirin, quqyqtary men bostandyqtaryn aıqyndap, bekitý; óz elinde jáne memleketter arasynda azamattyq beıbitshilikti, yntymaqtastyq pen tatý qarym-qatynas jasaý ádisterin ornyqtyrý; baıyrǵy qazaq jerinde memlekettik birlikti saqtaý; respýblıkanyń táýelsizdigin saqtap, ustap turý; Qazaqstan Respýblıkasynyń demokratııalyq negizderiniń myzǵymastyǵyn bekitý.
Alaıda, zamann úzdiksiz ózgerýde. Ýaqyt talabyna saı búgingi jahandyq úrdisterdiń shapshan qarqynmen damýy Qazaqstan Respýblıkasynyń Konstıtýtsııasyna tolyqtyrýlar men ózgertýlerdi qajet etti.
Bizdiń Elbasy qashan bolsyn aldymyzdy boljap ómir súrýdi, jahannyń bizdiń aldymyzǵa tartar syndaryna kúni buryn tastúıin ázir turýdy úıretip keledi. Osy oraıda, Elbasy bıylǵy jyldyń 25 qańtarynda Qazaqstan halqyna málimdeme jasap, «zaman ózgerdi, endi biz de ózgerýge tıistimiz» dep aıtqan biraýyz sózi bizdiń qazaqstandyq qoǵamnyń demokratııalyq damýynyń odan ári tereńdeı túsýine jol ashty.
Memleket basshysynyń usynysymen Konstıtýtsııaǵa tolyqtyrýlar men ózgertýler engizý, ıaǵnı, konstıtýtsııalyq reforma jasaý qajet boldy. Bul reforma barysynda, ıaǵnı, qańtar aıynyń 26-sy men aqpan aıynyń 26-sy aralyǵynda týra bir aı búkilhalyqtyq talqylaý júrdi.
Nátıjesinde Memleket basshysy Parlamentke Konstıtýtsııanyń 19 babyna 26 túzetý engizýdi kózdegen Zań jobasyn usyndy.
Esterińizde bolsa, Parlament depýtattary Parlament Palatalarynyń birlesken otyrysynda zań jobasyn birinshi oqylymda talqylaý kezinde birshama usynystardy jarııa etken bolatyn.
Sonymen, 6 naýryzda Parlament Palatalarynyń birlesken otyrysy ótip, depýtattar «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Qazaqstan Respýblıkasy Zańyn ekinshi oqylymda qabyldady.
Jalpy qazirgi kezde Parlament koldanystaǵy Konstıtýtsııanyń 25 babyna 32 túzetý engizýdi kózdeıtin Zań qabyldady jáne ony Memleket basshysyna qol qoıý úshin usyndy.
Qazirgi kezde atalǵan Zań jobasyn Memleket basshysy Konstıtýtsııanyń 72- babyna sáıkes Konstıtýtsııalyq Keńestiń qaraýyna jiberdi.