Qolarbada bıleıtin jigit: Qıyndyqty ómirge degen qushtarlyǵym jeńdi
Ermek Qalymbetov basyna túsken qıyndyqty ómirge degen qushtarlyqpen jeńip keledi. Eki aıaǵymen júre almasada jeńil atletıkadan álemdik jarystarǵa qatysyp, júldeli oryndardy ıelengen. Qolarbada jarysqa túsip, talaı baıraqty básekelerde top jarǵan. Al, qazirgi kezde Italııa, Shvetsııa, Qytaı, Reseı elderiniń sahnalarynda bı bılep kópshiliktiń ystyq yqylasyna bólenip júr.
«Alǵashqy kezde qıyn jaǵdaılardy bastan ótkerdim. Únemi «nege» degen suraq kókeıimnen ketpeıtin. Keıinnen taǵdyrdyń jazǵanyna kóne berýdi qup kórmedim. Táýelkel ettim. Arbada otyrypta arman – maqsatqa jetýge bolatynyn dáleldegim keldi» - deıdi ol.
Ermek aldyn sportpen shuǵyldanǵan. Jattyqtyrýshysy Arystan Orynbaev 17 jasar jetkinshekti jeńil atletıka jarystaryna daıyndady. Qolarbamen ótetin 100, 200, 400 metrlik jarystarǵa qatystyryp, shyńdady. Nátıjesinde jigerli jas jeńis tuǵyrynan kórinip, birshama jetistikke jetti.
«Jeńil atletıka eń qıyn sport túri ǵoı. Qıyn boldy. Degenmen, Taldyqorǵanda úsh dóńgelekti qol arbamen jarysqa qatysyp birinshi jáne ekinshi oryn aldym. 2009, 2011 jyldary Qazaqstan kýbogynan chempıon atandym. Al, paraolımpıada oıyndaryna arnalǵan lıtsenzııany alý úshin Dýbaıǵa barǵan sátimdi, jeńilip qaldym. Bul maǵan óte qatty soqty» - deıdi ol.
Ermek eki-úsh jyldaı ózin tastap jiberdim. El ishinde ótetin jarystarǵa qatysqanymen buryńǵydaı qyzyǵýshylyǵy bolmady. Sebebi, onyń bar oıy olımpıada chepıony ataný bolatyn. Shákirtiniń jaǵdaıyn jaqsy túsengen jattyqtyrýshysy ony bımen aınalysýǵa úndedi. Sodan Darııa Jumadilaeva esimdi úıirme jetekshismen tanystyrdy. Mine, sol sátten bastap jigerli jastyń jańa ómiri bastalyp, jańa qyry ashyla bastady.
«Bımen aınalysý qıyndyq týdyrǵanymen qyzyǵýshylyǵymdy arttyrdy. Sondaı-aq, ómirge degen qushtarlyǵymdy oıatty. Alǵashqyda kishigirim jarystardan birinshi oryn alyp júrdim. Keıin daıyndyqty kúsheıtip, úlken jarystarǵa shyǵa bastadyq. Qaraǵandy men Almatydan da júldemen oraldym. Keıin shetelge shyǵyp, óner kórsettik» - deıdi ol.
Ermek bı alańyna shyqqanda óz erkin ustaıdy. Erkin qozǵalyp, mýzykanyń yrǵaǵyna saı ıkemge túsedi. Qol arbasy da bıge arnalǵan. Qazir ol úshin samba, rýmba, tango, vals, lambada sekildi bı túrlerinde óner kórsetý túkte qıyn emes. Tipti arbada otyrǵanyn umytyp ta ketetin kezderi bar. Búginge deıin Taıvan, Belgııa, Germanııa, Italııa, Slavakııa, Polsha, Reseıde óner kórsetip, júldeli oryndardyń ıegeri atandy. Germanııada «Adaı» kúıine bılep 4-shi orynnan kórindi. Qazir de kezekti jarystarǵa daıyndalyp jatyr.
«Jattyqtyrýshym Darııa Jumadilaeva men Arystan Orynbaevqa jáne qasymda birge bıleıtin juptasym Kúlshim Atalyqova men Aıdana Muqanovaǵa alǵysymdy bildiremin. Aıdana da men sekildi qolarbaǵa tanylǵan qyz. Ózi talapshyl, jigerli. Barlyǵy maǵan qoldaý bildirip, jetistikke jetýime sebepker bolyp otyrǵan jandar»- deıdi Ermek.
Búginde bıshi jigitti is-sharalarda óner kórsetýge shaqyryp turatyn mekemeler kóp. Tipti toıǵa da shaqyratyn bar. Degenmen, Ermek toıda óner kórsetýge qarsy. Al, is-sharalardan qalmaýǵa tyrysady.
«Jarys pen toıdyń aýrasy bólek. Toıdaǵy halyq janashyrlyqpen júregi aýyryp qarap otyrady. Sonyń barlyǵyn sezinip júremiz. Bir ret toıǵa barǵanmyn. Kópshiliktiń nazaryn kótere almaı qulap qaldym. Sodan beri toıǵa shaqyrtýlarǵa shyqpaımyn. Al jarys - básege. Talpynys. Jalpy bizge janashyrlyq qajet emes» - deıdi ol.
Ermek Jorabekuly táýelsizdikpen túıedeı qurdaı. 1991 jyly dúnıege kelgen. Al, 1998 jyly Qasqasý aýylyndaǵy mektep-ınternatty bitirdi. Keıinnen Agrarlyq kolledjde baǵdarlamashy mamandyǵyn meńgerdi. Qazir Túrkisan oblysy jumyspen qamtýdy úılestirý jáne áleýmettik baǵdarlamalar basqarmasyna qarasty №5 arnaýly áleýmettik qyzmetter kórsetý ortalyǵynde mýzykalyq jetekshi bolyp eńbek etip júr. Aýdandardan emdelýge kelgen jarymjan jandarǵa kontsert uıymdastyrady. Jubaıy Álııa ekeýi Alına esimdi qyz ósirip otyr.
«Shymkentte jumys isteıtin bolǵandyqtan qarashańyraqtan kettim. Alǵashqyda ákem men anam qatty ýaıymdap qaldy. Qoryqty. Al, qazir chempıon uldaryn maqtan tutady» - deıdi ol.
Ermek bos ýaqytynda týrnıkke tartylyp, brýsııada oınaıdy. Jattyǵýlar jasaıdy. Arqanǵa órmelep, túsedi. Qol arbasymen 5-shi qabatqa deıin baspaldaqpen qınalmaı shyǵyp túse alady.
«Búginge deıin talaı qıyndyqty kórdim ǵoı. Balalarmen birge joǵary qabattan páter jaldap turdyq. Oǵan shyǵyp túsý, kóshede júrý qıynnyń qıyny edi. Qazir sonyń barlyǵyn jeńip kelemin. Bul meniń ómirge degen qushtarlyǵym bolsa kerek. Alda da otbasymdy baqytty etý jolynda barymdy salamyn. Paraolımpıada óner kórsetip, chempıon bolamyn degen oıymnan da aınyǵan joqpyn. Qazir soǵan daıyqtyqty bastadym. Naıza laqtyrýdy meńgerip jatyrmyn» - deıdi ol.
