Kókjaılaý jáne jańa aspaly jol: Almaty taý klasteri qalaı damıdy
ALMATY. KAZINFORM — Álemniń túkpir-túkpirinen týrıster jınalatyn torapqa aınalǵan Almaty taý klasteri qalaı damymaq? Kazinform tilshisi anyqtap kórdi.
Ótken jyldyń 9 aıynda Almatyǵa 1,7 mln týrıst kelgen. Onyń 500 myńnan astamy — sheteldik saıahatshylar.
Megapolıs elimizdegi týrızm kórsetkishi boıynsha kóp jyldan beri alda keledi. Oǵan týrıster úshin tartymdy Almaty taý klasteriniń áseri bary sózsiz.
Osy oraıda agenttik Týrızm jáne sport mınıstrligine aıtylǵan aımaqty odan ári damytý jospary jaıynda saýal joldady.
Vedomstvo jaýabyna sáıkes, qazirgi ýaqytta Almaty taý klasterin damytýdyń 2025-2029 jyldarǵa arnalǵan keshendi jospary ázirlenip jatyr.
Bul jospar sheńberinde aýmaqtyń tabıǵı erekshelikterin eskere otyryp jáne ekojúıeniń tutastyǵyn buzbaı aspaly joldardy, taý-shańǵy trassalaryn salý, kempıngter, vızıt-ortalyqtar, ekologııalyq marshrýttar men navıgatsııalyq ınfraqurylym qurý josparlanǵan.
— Almaty taý klasterin Qazaqstandaǵy alǵashqy jyl boıy jumys isteıtin iri týrıstik joba retinde damytý — Almatynyń halyqaralyq týrızm ortalyǵy retindegi pozıtsııasyn nyǵaıtýdaǵy mańyzdy qadam bolady, — delingen Týrızm jáne sport mınıstriniń orynbasary Erjan Erkinbaevtyń jaýabynda.
Taýly aımaqtaǵy týrızmdi damytýdyń basym baǵyttardyń biri — Shymbulaq jáne Oi-Qaragai taý shańǵy kýrorttaryn Qımasar, Býtakovka shatqaldary arqyly aspaly joldarmen jáne taý shańǵysy trassalarymen qosý bolmaq.
— Bıyl daıyndyq jumystary bastalady. Geodezııalyq jáne geotehnıkalyq taldaý júrgizý, aspaly joldardyń, taý shańǵysy trassalarynyń jáne basqa da ınjenerlik ınfraqurylymnyń qurylysyn jobalaý men rekonstrýktsııalaýdy qamtamasyz etý úshin tehnıkalyq-ekonomıkalyq negizdemeni, jobalaý-smetalyq qujattamany ázirleý josparlanyp otyr, — dep jaýap berdi vıtse-mınıstr.
Odan bólek Týrızm jáne sport mınıstrliginiń málimetinshe, Almaty taý klasterinde týrızmdi damytý úshin navıgatsııalyq obektilerdi ornata otyryp, jalpy uzyndyǵy 100 shaqyrym bolatyn 10 taý baǵyty qurylady.
Sonymen qatar kún panelderin ornata otyryp, jetýi qıyn jerlerde úsh kempıng-aımaq ashylady, Alma-Arasan bulaǵy qaıta jańartylady jáne Fýrmanov shyńynyń etegine átkenshek ornatylady.
— Almaty taý klasterin damytýdyń keshendi josparyna sáıkes respýblıkalyq jáne jergilikti bıýdjetten qarajat bólý, sondaı-aq jeke ınvestıtsııalar tartý kózdelgen, — dep túsindirdi vedomstvo.
Kókjaılaýda taý kýrorty bola ma?
2014 jyly Úkimettiń qaýlysymen jalpy aýmaǵy 1002 gektar Іle Alataýy memlekettik ulttyq tabıǵı parkiniń jeri aıryqsha qorǵalatyn tabıǵı aýmaq sanatynan Almaty qalasynyń Medeý aýdanynyń qory sanatyna Kókjaılaý taý shańǵy kýrortynyń qurylysy men jumys isteýi úshin berilgen bolatyn.
2019 jyly qazan aıynda Prezıdent Qasym-Jomart Toqaev jurtshylyqtyń pikirin eskere kelip, Kókjaılaý shatqalynda taý shańǵysy kýrortyn salý jobasyna tyıym salǵan edi.
Al 2022 jyly «Kókjaılaý» shatqaly Іle Alataýy ulttyq parkine qaıtaryldy.
Týrızm jáne sport mınıstrligi Almaty taý klasterin damytý jospary aıasynda Kókjaılaý taý kýrortyna qatysty qandaı sheshim qabyldanǵanyn da habarlady.
— Qazirgi ýaqytta Kókjaılaý shatqalyndaǵy taý kýrortynyń tujyrymdamasy men jobalaý-smetalyq qujattamasyn daıyndaý úshin qajetti taldamalyq jumys júrgizilýde. Jobany qarjylandyrý qaryz qarajaty esebinen júzege asyrylatyn bolady, — dep habarlady mınıstrlikten.
Resmı jaýapqa sáıkes, Kókjaılaý jobasyn qurylys júretin aýmaqty erekshe qorǵalatyn tabıǵı aýmaqtar quramynan, ıaǵnı Іle-Alataý memlekettik ulttyq tabıǵı parkiniń quramynan shyǵarmaı júzege asyrý josparlanyp otyr.
Odan bólek vedomstvo jańa kýrort jobasynyń birneshe jyl burynǵy bastamadan qandaı aıyrmashylyǵy bar ekenin túsindirdi.
Atap aıtqanda, jobany iske asyrý joǵary ekologııalyq standarttardy saqtaý boıynsha basymdyqpen júzege asady jáne is júzinde tabysty jobalardy iske asyrǵany belgili halyqaralyq sarapshylar tartylady.
Sondaı-aq qorshaǵan ortaǵa teris áserdi boldyrmaıtyn zamanaýı, emıssııasyz, shýylsyz jáne ózge de tehnologııa engiziledi.
Oǵan qosa, kýrorttyń jalpy aýmaǵynyń 2-3 paıyzdan aspaıtyn bóligi ǵana kommertsııalyq ınfraqurylymǵa, ıaǵnı qonaq úı, jalǵa berý pýnkteri, dúkender úshin paıdalanylady.
— Memlekettik ulttyq tabıǵı parktiń qorǵaý aımaǵynda kýrort salýdyń zańdylyǵy týraly máselege qatysty Erekshe qorǵalatyn tabıǵı aýmaqtar týraly zańnyń 46-babyna sáıkes parktiń jer ýchaskeleri qoldanystaǵy ınfraqurylymy bar aımaqtarda týrıstik qyzmetti júzege asyrý úshin, sondaı-aq jańa ınfraqurylym júrgizý úshin bir jyldan bes jylǵa deıingi merzimge qysqamerzimdi paıdalanýǵa jáne bes jyldan jıyrma bes jylǵa deıingi merzimge uzaqmerzimdi paıdalanýǵa beriledi, — dep habarlady mınıstrlikten.
Eske salaıyq, buǵan deıin Kúıgensaı shatqalynda týrısterge arnalǵan jańa jaıaý júrginshiler kópiri ashylatynyn jazǵanbyz.