«Kóktóbe» telemunarasynyń úsh ólshemdi túrli-tústi modeli paıda boldy

ALMATY. KAZINFORM — «Qazteleradıo» AQ «Kóktóbe» telemunaraǵa qatysty jaǵymdy jańalyqtarymen bólisti. 

1983 jyly salynǵan «Kóktóbe» telemunarasy «Qazteleradıo» AQ telehabar taratý ınfraqurylymynyń mańyzdy bólshegi.Telemunara búkil respýblıka kóleminde mıllıondaǵan kórermenge habar taratýdy qamtamasyz etedi.

Bıiktigi 371,5 metr munara Qazaqstannyń erkin turǵan ımarattary ishinde bıiktigi boıynsha ekinshi oryndy jáne álemde 41 oryndy ıelenedi.

«Kóktóbe» telemunarasy televızııalyq jáne radıosıgnaldar jiberýde sheshýshi ról atqaryp, turaqty ári sapaly habar taratýdy qamtamasyz etip otyr.

«Endi onyń biregeıligin tsıfrlyq pishinde baǵalaýǵa bolady. Kazakh Tourism jáne Yandex Qazaqstan jobasy aıasynda ıAndeks kartalarda «Kóktóbe» telemunarasynyń úsh ólshemdi túrli-tústi modeli paıda boldy. Ony endi barlyq jaǵynan qaraýǵa bolady, al túngi taqyrypqa aýysqan kezde telemunara qosymsha ádemi sáýlelenedi», - delingen habarlamada.

Osyǵan deıin Almaty ákimi Erbolat Dosaev qala sımvolynyń biri – «Kóktóbe» telemunarasynyń qurylys-montaj jumystary bıyl mamyr-maýsym aılarynda aıaqtalatynyn jetkizgen edi.