«Kóktemgi egis naýqanyna daıynbyz ba?» - baspasózge sholý
***
Keshe Táýelsizdik saraıynda Memleket basshysy, «Nur Otan» partııasynyń Tóraǵasy Nursultan Nazarbaevtyń qatysýymen «Elbasymen birge - jańa jeńisterge» atty jastar forýmy ótti. Jastar úshin mańyzǵa ıe forým bastalǵannan keıin alǵashqy sóz Memleket basshysy Nursultan Nazarbaevqa berildi. Bul jaıynda «Egemen Qazaqstan» gazetiniń senbilik sanyndaǵy «Elbasymen birge - jańa jeńisterge» atty maqalada keńinen baıandalǵan. Basylymnyń jazýynsha, Elbasy buryn tıimsiz memleketter aıtarlyqtaı uzaq ómir súre alatynyna toqtala kele, búginde básekelestikke daıyn emes ekonomıkalardyń sanaýly jyldar ishinde kúırep túsýi múmkin ekenine nazar aýdardy. «Tarıh eki túrli baǵany ǵana biledi - ne uttyń, ne utyldyń. Sondyqtan, memleket sizderge damý úshin barlyq jaǵdaılar jasady, tipti, odan da artyq dese de bolady. Ózińniń talantyń men eńbegińniń arqasynda jaqsy oqýdyń, ózińniń mansap jolyńdy tańdaı bilýdiń, qoǵamda óz ornyńdy taba bilýdiń mańyzy óte zor. Eshkim de, eń damyǵan eldiń birde-birinde de ózimizden basqa, bireýler kelip bizdi ál-aýqatty jasamaıdy. Sondyqtan da, biz Jalpyǵa Ortaq Eńbek Qoǵamyn quryp, Eńbek Adamyn birinshi kezekke shyǵarýdamyz», - dedi Prezıdent.
«Keshe «Atameken» ulttyq kásipkerler palatasynda Premer-Mınıstrdiń orynbasary Berdibek Saparbaevtyń tóraǵalyq etýimen Áleýmettik áriptestik jáne áleýmettik-eńbek qatynastaryn retteý jónindegi respýblıkalyq úshjaqty komıssııanyń otyrysy ótti. Onda áleýmettik jaýapkershilikpen birge ózge de birqatar máseleler talqylandy», - dep jazady «Egemen Qazaqstan» gazeti «Kúrdeli máselelerge mán berildi» degen taqyryptaǵy maqalasynda. Vıtse-premer Ulttyq kásipkerler palatasynyń áleýmettik jaýapkershilikke qatysty daıyndaǵan tujyrymdamasyna jaqsy baǵa bere kelip, bul ıgi sharalar Memleket basshysynyń tikeleı tapsyrmasynyń arqasynda júzege asyrylyp jatqanyn eske saldy. Sondyqtan, áleýmettik máselelerdi Úkimet pen Ulttyq kásipkerler palatasy jáne kásiporyndardyń basshysy únemi birlese sheshýleri kerek ekenin aıtty. Sóıtip, qazirgi álemdik ekonomıkalyq daǵdarys kezinde bar jumys oryndaryn saqtaýmen qatar, jańa qyzmet oryndaryn ashý asa mańyzdy ekenine aıryqsha toqtaldy. Sondaı-aq, ómir aǵysyndaǵy túrli jaǵdaıda jumysshylardy áleýmettik qamsyzdandyrý asa mańyzdy ekenin shegeledi.
***
«Eger Eýrazııalyq ekonomıkalyq odaqqa ortaq valıýta qajet pe, degen suraqqa jaýap bere qalsaq, ol qajet der edik. Biraq ol qajettiliktiń keletin kezi bolady», - dep jazady «Aıqyn» gazeti. Basylymnyń jazýynsha, odaqqa birikken elder arasynda ortaq valıýtanyń bolýy tabıǵı zańdylyq. Biraq ol úshin eń aldymen eki suranys ómirden oryn alýy tıis: Odaqqa memleketterdiń taýar aınalymynyń ósimi sonshalyqty molaıyp, ol úshin esep aıyrysýǵa ulttyq valıýtalar massasynyń jetispeýshiligi oryn alatyn jaǵdaı, Odaqqa birikken memleketterdiń ekonomıkalyq damýy men halqynyń áleýmettik-turmystyq jaǵdaıy teń dárejede bolýy. «Ortaq valıýta týraly áńgime bolǵanda keıbireýler ony «qubyjyq» retinde kórsetkisi keletindeı. Aıtalyq, «rýbl ortaq valıýta bolady eken» deýshiler shyǵyp júr. Birinshiden, rýbl eshqashan da ortaq valıýta bolmaıdy. Buǵan Reseıdiń ózi barmaıdy. Eger ol jolǵa túse qalsa, «sorlaıtyn» basqa emes, Reseıdiń ózi bolady. Sondyqtan jańadan ómirge keletin ortaq valıýta esh memlekettik bılikke baǵynbaıtyn, tek ıntegratsııalyq odaqtyń ortaq múddesine qyzmet etetin, baǵamy konsensýstyq negizde birlesip sheshiletin múlde jańa aıyrbas quraly bolary sózsiz. Bálkim, Eýrazııalyq ekonomıkalyq odaqtyń avtory Nursultan Nazarbaevtyń o basta usynǵanyndaı ol valıýta «Altyn» dep atalar», - dep jazady avtor. Maqala «Ortaq valıýtaǵa alańdamaıyq» degen taqyryppen berilgen.
«Aıqyn» gazetiniń jazýynsha, Aýyl sharýashylyǵy mınıstriniń orynbasary Saparhan Omarov bıyl 21,5 mln. gektar alqapqa aýyl sharýashylyǵy daqyldary sebiletinin málimdedi. Onyń 18,5 mln gektaryn osy kóktemgi egistik kezinde paıdalanbaq. «Egis jumystaryna aýyl sharýashylyǵy tehnıkalary da daıyn tur. Respýblıka boıynsha 154 myń traktor, 90 myń dánsepkish, 334 myń topyraq óńdeý quraly, 5 myń búrikkish, 3,4 myń zamanaýı joǵary ónimdi sebý kesheni jumyldyrylmaq. Bular kók¬temgi egis naýqanyna saqadaı saı. Dıqandar da kóktemgi egis naýqanyna daıyn. Kók¬temgi dala jumystaryn júrgizý maq¬satynda sha-rýalarǵa 60 mlrd teńge kóleminde jeńildetilgen nesıe bólindi. Al ótken jyly dı-qandarǵa bólingen nesıe 20 mlrd teńge ǵana bolatyn. Atalǵan qarajat nesıe túrinde ekinshi deńgeıli bankter, Azyq-túlik keli¬simshart jáne Agrarlyq nesıe korporatsııalary arqyly bólinedi», - delingen «Kóktemgi egis naýqanyna daıynbyz ba?» degen taqyryptaǵy maqalada.
***
«Shymkentte 9 synypta oqıtyn 2 qyzdy zorlady degen kúdikpen 3 jigit ustaldy», - dep jazady «Ekspress K» gazeti senbilik sanyndaǵy «Gormonalnyı sdvıg» degen taqyryptaǵy maqalasynda. Basylymnyń jazýynsha, olar qyzdardy urlap áketip, birneshe kún boıy jynystyq quldyqta ustaǵan. 15 jastaǵy qyzdar sabaqtan keıin joǵalyp ketken. Olardyń týystary polıtsııaǵa júgingenimen, quqyq qorǵaýshylar aryz jazý úshin úsh kún kúte turý kerektigin aıtqan. Osydan keıin qyzdardyń ata-analary óz betterinshe izdeýge kirisken. Olar joǵalǵan oqýshylarǵa uqsas 2 qyzdy úsh jigittiń taksıge otyrǵyzǵanyn anyqtaǵan. Dál osy sát kóshe boıyndaǵy kameraǵa jazylǵan. Sol arqyly taksı júrgizýshisin, al odan keıin kúdiktilerdi taýyp alǵan. Qyzdardyń týystary tapqan aqparattar poltsııaǵa kúdiktilerdi ustaýǵa septigin tıgizdi. Biraq bul ýaqytta qyzdar tutqynnan qashyp shyqqan edi. Olardy qala saıabaǵynda qan tamyrlaryn kesip tastap jatqan jerlerinen taýyp aldy.
