Kóktemgi sý tasqyny: Aqmolada jaǵdaı baqylaýda
KÓKShETAÝ. KAZINFORM — Aqmola oblysynda kóktemgi sý tasqynynyń qarqyny bastaldy, biraq bul jaǵdaı jergilikti quzyrly organdar úshin tosyn syı emes. Olar jedel áreket etýdi bastady. Tasqyn sýdyń aldyn alý úshin tehnıka birlikteri tolyq qýatynda jumys istep jatyr.
Mamandardyń baǵalaýynsha, bıylǵy sý tasqyny kezeńi aýa raıynyń kúrdeliligine qaramastan, turaqty ótýde. Kúnniń kúrt jylynýy qardyń erýin jedeldetip, Esil, Jabaı jáne Nura ózenderinde muz qabatynyń álsireýine ákeldi, bul qar sýynyń aǵýyn kúsheıtti.
Eldi mekenderdi sý basý qaýpiniń aldyn alý úshin shuǵyl sharalar qabyldanýda. Qazirdiń ózinde úsh mıllıon tekshe metrden astam qar shyǵarylyp, 300 myń tekshe metr erigen sý soryldy. Turǵyn úılerdi qorǵaý maqsatynda 25 myń qap ınertti materıal tóseldi. Sondaı-aq, ózenderdegi muz keptelisiniń aldyn alý úshin 25 myń sharshy metr aýmaqta jarý jumystary júrgizildi. Bul sý aǵysynyń erkin qozǵalýyna jáne muz bógetteriniń paıda bolý qaýpin azaıtýǵa kómektesedi.
Kóktemgi erigen qar sýynyń deńgeıi kóterilýi avtojoldarǵa da áser etti. Alaıda, bıylǵy sý tasqyny eldi mekenderge qaýip tóndirmeıdi. Sý deńgeıi tómendegennen keıin qalpyna keltirý jumystary dereý júrgizilýde. Mysaly, Şýchınsk – Stepnıak – Ýálıhanov tasjolyndaǵy qozǵalys qysqa merzimde qalpyna keltirildi.
«Qazgıdromet» málimetinshe, sý tasqynynyń belsendi kezeńi 24 naýryzdan keıin bastalady. Osyǵan baılanysty oblystaǵy barlyq kúshter men tehnıka kúsheıtilgen rejımge aýystyryldy. Qutqarý sharalaryna Astana, Qaraǵandy jáne Almaty oblystarynan kelgen TJM bólimsheleri men Aqmola oblysynyń aýmaqtyq qorǵanys qyzmetkerleri jumyldyryldy.
Sý tasqynyna qarsy is-sharalar aýa raıy jaǵdaıyna jáne boljamdarǵa sáıkes ýaqytyly túzetilip otyrady. Jaǵdaı óńirlik bıliktiń erekshe baqylaýynda.
Aıta keteıik, buǵan deıin elimizdiń sý qoımalaryndaǵy jaǵdaı qandaı ekenin jazdyq.