Kóktemde Astanada egeýrquıryq qaptaýy múmkin – sanepıdemıologııa departamenti

ASTANA. KAZINFORM – Astana qalasy sanıtarııalyq-epıdemıologııalyq baqylaý departamenti basshysynyń orynbasary Janna Pralıeva bıylǵy kóktemde elordada kemirgishterdiń qaptaıtyny týraly málimetke pikir bildirdi.

— 2024 jylǵy sý tasqyny, jaýyndy jaz, qys mezgiliniń jyly bolýy kemirgishterdiń kóbeıýine qolaıly bolyp tur. Kemirgishter orta ylǵaldy, azyq mol bolsa, tez jetiledi. Keıbir túrleri jyl boıy kóbeıe beredi, jylyna 10 ret balalaıdy. Tyshqandar dalaly jerde 25-40 sm tereńdiktegi inderde, al qalaly jerde qaraýsyz qalǵan úı-jaılardy, eski qurylys alańdaryn mekendeıdi, — deıdi ol.

Sondaı-aq astanalyqtar tarapynan shaǵym túsip jatqanyn aıtady. 

— Deratızatsııalaý sharalarynyń aıaqtalǵanyna qaramastan, elorda turǵyndarynyń kemirgishterge qatysty shaǵymdary azaımaı otyr. Osyǵan baılanysty Ulttyq saraptama ortalyǵynyń «Asa qaýipti ınfektsııalar zerthanasymen» birge júrgizilgen málimetterdi taldaı otyryp, qolaıly gıdroklımattyq jaǵdaılardy eskere otyryp, 2025 jyly kóktemde kemirgishter sanynyń aıtarlyqtaı ósýi múmkin dep boljaımyz, — deıdi Janna Pralıeva. 

Astana qalasynyń Qorshaǵan ortany qorǵaý jáne tabıǵat paıdalaný basqarmasy «Asa qaýipti ınfektsııalar zerthanasymen» birlesip aqpan-qarasha aılarynda egeýquıryqtardy aýlap, synamalar alǵan.

— Byltyrǵy synamalardyń hattamasy aýlanǵan kemirgishterden asa qaýipti ınfektsııalarǵa teris nátıje berdi. Astana qalasynda tyshqan men egeýquıryqtyń sý toqaltisi, sur toqaltis, orman jáne úı tyshqany sııaqty túrleri jıi kezdesedi. Sonymen qatar sur jáne qara egeýquıryqtar bar. Kemirgishterdiń sany týraly zerthanaǵa aýlanǵan býaz analyqtardyń ishindegi embrıondar sanyna qarap yqtımal boljam jasaımyz. Qazirgi tańda aýlanǵan tyshqandarda 7-9 danaǵa deıin embrıondar bary anyqtaldy, — deıdi departament ókili. 

Aıtýynsha, egeýquıryq pen tyshqandar týlıaremııa, ıersınıoz, lısterıoz, leptospıroz, qutyrma, ókpe obasy sııaqty ár túrli asa qaýipti juqpaly aýrýlardy tasymaldaıdy.

Eske salaıyq, byltyr jazda Aqtaýda kemirgishter qaptap, ýlaý jumystary júrgizilgen bolatyn.