Kóktem mezgilinde kene entsefalıtinen qalaı saqtaný qajet

Kene entsefalıti - ortalyq júıke júıesiniń basym zaqymdanýymen sıpattalatyn qaýipti aýrý. Aýrýdyń saldary múgedektikke, ólimge ákelýi nemese adam densaýlyǵy tolyǵymen saýyǵyp ta ketýi múmkin.
Infektsııa negizinen kene entsefalıt vırýsyn tasymaldaýshy ıksodty kenelerdiń tisteýi nátıjesinde paıda bolady. Budan basqa, vırýspen zaqymdanǵan keneler shabýyl jasaǵan janýarlardyń shıki sútin ishý arqyly, sonymen qatar, kenelerdi qolmen myjyǵanda aýrýdy juqtyryp alý múmkin.
«Kene entsefalıtine qarsy neǵurlym tıimdi ádis: 1 aıdan 7 aıǵa deıingi aralyqta eki egýden turatyn kene entsefalıtine qarsy vaktsınatsııalaý bolyp tabylady. Birinshi jáne ekinshi vaktsınatsııalaý kúzden kóktemge deıingi aralyqta jasalǵany durys. Revaktsınatsııa bir jyldan soń júrgiziledi. Keıingi revaktsınatsııalaý 3 jylda bir ret júrgiziledi»,- dep málimdedi departamentte.
Kene entsefalıtine qarsy egýdi aýdandyq emhanalarda tegin alýǵa bolady. Kúzgi-qysqy kezeńde egýdi ýaqytynda almaǵandar úshin egýler arasyndaǵy aralyq 2 aptaǵa deıin qysqartylǵan shuǵyl shemadaǵy ekpeni qoldanýǵa bolady. Tabıǵı oshaqqa ekinshi vaktsınatsııalaýdan keıin eki apta ótken soń ǵana barýǵa ruqsat etiledi.
«Keneniń tabıǵı oshaǵy bolyp sanalatyn aımaqtarǵa barǵanda kenelerdi úrkitetin zattardy - repellentterdi qoldanyp, keneniń bar-joǵyn anyqtaý úshin eki saǵat saıyn kıimdi, deneni jáne basqa zattardy tekserip otyrý qajet. Deneni tolyǵymen jaýyp turatyn kıimder kııý kerek (jabysyp turǵan keneni baıqaý úshin ashyq tústi kıimder):
shalbardyń balaǵy etikke, rezeńkesi bar shulyqqa, joǵarǵy syrtqy kıim shalbarǵa salynýy kerek;
kıimniń jeńinde manjet bolýy qajet;
keneniń denege enip ketpeýi úshin, kıimniń jaǵasy men shalbardyń ilgegi bolýy kerek;
basyna kúrteshege, kóılekke tigilgen kapıýshon nemese shashty jınap qalpaq, oramal kııý kerek.
Denede shaqqan keneni baıqaǵan jaǵdaıda, barynsha erterek (kene shaqqannan keıin 4 kúnnen keshikpeı) medıtsınalyq mekemelerge (travmatologııalyq ortalyqtarǵa) júginý qajet, onda olar bilikti medıtsınalyq kómek kórsetip, shuǵyl seroprofılaktıka jasaý qajettiligi týraly sheshim qabyldaıdy (kene entsefalıtine qarsy ımmýnoglobýlındi engizý).
Kene entsefalıtiniń shuǵyl seroprofılaktıkasy Almaty qalasynda kelesi medıtsınalyq uıymdardyń (travmatologııalyq ortalyqtardyń) bazasynda júrgiziledi:
1) Ortalyq qalalyq klınıkalyq aýrýhana (Jandosov kóshesi, 6, tel. 274-84-43) – Bostandyq jáne Medeý aýdandarynyń eresek turǵyndaryna kómek kórsetedi;
2) Jedel járdem kórsetetin aýrýhana - (Qazybek bı kóshesi, 96, tel. 292-31-01) – Almaly aýdanynyń eresek turǵyndary úshin;
3) №4 qalalyq klınalyq aýrýhana (Papanın kóshesi, 220, tel. 300-37-01) – Jetisý jáne Túrksıb aýdandarynyń eresek turǵyndary úshin;
4) №7 qalalyq klkınalyq aýrýhana (Qalqaman yqsham aýdany, 20, tel. 270-86-14) – Alataý, Áýezov jáne Naýryzbaı aýdandarynyń eresek turǵyndary úshin;
5) Medıtsınalyq jedel járdem kórsetetin balalar ortalyǵy (Manas kóshesi, 40, tel. 274-83-19) – qalanyń barlyq aýdandarynyń 14 jasqa deıingi balalary úshin.
Kene entsefalıti vırýsymen zaqymdanǵan keneni zertteý, kene shaǵýdan zardap shekkenderdiń qanyn serologııalyq zertteý JShS RMK Almaty qalasy boıynsha «Ulttyq saraptama ortalyǵy» fılıalynyń juqpaly aýrýlar zerthanasynda (Jibek Joly kóshesi, 3, tel. 382-33-90) júrgiziledi»,- dep málim etti Almaty qalasynyń sanıtarııalyq-epıdemıologııalyq baqylaý departamenti.