Kóktem merekesin túrikmender qalaı toılaıdy

ASTANA. QazAqparat - Túrikmenstandyqtar Halyqaralyq Naýryz kúni men Ulttyq kóktem merekesin toılap jatyr. Olar mereke kúnderi ulttyq kıimderin kıip sándenip, kóktemgi jańarý men jasarý meıramyna qatysty ǵasyrlar boıy qalyptasqan salt-dástúrleri men ádet-ǵuryptaryn kórsetedi.

Naýryzdy túrikmender Novrýz deıdi. Bul meıram týysqan túrikmen halqynyń da mádenıetimen, ómirimen, tarıhı shejiresimen astasyp jatyr. Jyl saıyn jańarý merekesine oraı Túrikmenstanǵa álemniń kóptegen elderinen kelgen qonaqtar ulttyq taǵamdardan dám tatyp, birge toılaıdy.

Merekeniń basty sharalary tabıǵaty tamasha taý baýraıyndaǵy «Nowruz ýaýlasy» alańynda ótedi. Onda ashyq aspan astynda túrikmenderdiń dástúrli turmysyn órnekteıtin saltanatty ekspozıtsııa qurylady. Óıtkeni kún men tún teńelgen meıram kóktemgi egin salýmen, tirshiliktiń oıanýymen tyǵyz baılanysty.

Ekspozıtsııany mýzykalyq-etnografııalyq ujymdar arnaıy daıyndap kelgen ónerlerimen súıemeldeıdi. Al qoldanbaly óner týyndylarynyń kórmesinde qonaqtar nazaryna halyqtyń ejelgi turmys-tirshiliginen syr shertetin, egin salý, jer jyrtý, qolóner buıymdaryn jasaý jumystaryna arnalǵan kórinister usynylady.

Áıelder jaǵy Novrýz ánderin shyrqap, astyq óńdeýdiń, dıirmende un tartý túrli kezeńderin kórsetip, alýan túrli táttiler, chýreka, pıshme, laǵman sııaqty nebir dámdi taǵamdar ázirleıdi.

Merekede at sportynyń «Galkynysh» tobynyń ártisteri túrikmenniń asyl tuqymdy aqalteke attaryna minip, tamasha ónerlerimen jınalǵan jurtty tamsandyrady.

Halyq qolóner týyndylarynyń keremet úlgisi - túrikmen kilemderi. «Nowruz ýaýlasy» alańyndaǵy kilem kórmesine kelgen adam túrikmenderdiń ári sulý, ári tozbaıtyn kilemderin toqý úlken mashaqat pen eńbekti, sabyrdy, sonymen qatar zerek oıdy talap etetinine kóz jetkizedi.