Kóktem bastalǵaly eldegi joldardy 66 ret sý basqan

ASTANA. KAZINFORM – Kólik mınıstri Marat Qarabaev Úkimet otyrysynda tasqyn bolyp jatqan óńirlerdegi joldardyń ahýaly týraly málimet berdi.

«Kóktem bastalǵaly respýblıkalyq avtojoldarynda 66 sý basý faktisi tirkeldi. Búgingi Abaı, Batys Qazaqstan, Qaraǵandy, Qostanaı, Ulytaý oblystaryndaǵy 5 joldyń jalpy uzyndyǵy 980 metr bolatyn ýchaskeler (Omby-Maıqapshaǵaı, Podstepnoe-Fedorovka, Qaraǵandy-Aıagóz-Buǵaz, Qyzylorda-Pavlodar, Marınovka aýylyna kireberis) sý asytnda qalyp otyr. Osyǵan baılanysty jalpy uzyndyǵy 410 shaqyrym bolatyn 6 jolda qozǵalys shekteldi. Qaýipti ýchasteler men jasandy qurylystar táýlik boıy baqylaýǵa alynǵan», - dedi mınıstr.

Marat Qarabaev jol boıyndaǵy ótkelder men sýaǵarǵa mol kólemdegi aǵyn syımaǵandyqtan jol tósenishterin májbúrli buzý jumystary júrgizilip jatqanyn aıtady.

«Bıyl 28 naýryzda Aqtóbe oblysy Samara-Shymkent jolynyń ýchaskesinde Yrǵyz ózeni arqyly ótetin kópirdiń kire berisin sý shaıyp ketti. Jol táýlik ishinde qalpyna keltirilip, qozǵalys qamtamasyz etildi. 30 naýryzda Qaraǵandy oblysy Bastaý-Aqtaý-Temirtaý jolynyń Nura stantsııasy aımaǵynda ornalasqan eldi mekendi saqtaý úshin jol tósemi májbúrli buzyldy. Sý deńgeıi tómendegennen keıin joldyń bul bóligi qalpyna keltiriledi. Aqtóbe oblysynda Qandyaǵash-Embi jáne Soltústik Qazaqstan oblysynda Kókshetaý-Omby joldarynyń ýchaskelerinde jol tósemine azdaǵan zaqym tirkelip, olardy joıý boıynsha jedel sharalar qabyldandy», - dedi vedomstvo basshysy.