Kóktem-2023: Qaraǵandy oblysynda sý tasqynyna daıyndyq sharalary pysyqtaldy
Qazaqstanda 2 naýryzda bastalǵan «Kóktem-2023» respýblıkalyq komandalyq-shtabtyq oqý-jattyǵýy aıasynda oblystyq TJD kóktemgi sý tasqynyna daıyndyq sharalaryn pysyqtady. Basty maqsat – sý basýǵa beıim eldi mekenderdegi tasqynnan bolatyn zardaptardy azaıtý. Oqý-jattyǵýdy úılestirý jáne basqarý jónindegi shtab Qaraǵandyda ornalasqan. Jetekshisi – Tótenshe jaǵdaılar vıtse-mınıstri, general-maıor Marat Kúldikov.
Oqý-jattyǵýǵa tótenshe jaǵdaılar, ishki ister mınıstrlikteriniń bólimsheleri, jergilikti atqarýshy organdar, azamattyq qorǵaý qyzmetteri, Ulttyq ulannyń áskerı bólimderi men Qorǵanys mınıstrliginiń ókilderi tartyldy.
«2-3 naýryzda respýblıkanyń barlyq aýmaǵynda «Kóktem-2023» komandalyq-shtabtyq oqý-jattyǵýy ótip jatyr. Bıyl biz ótken sý tasqyny kezeńin taldaýdy eskere otyryp, ózgerister engizdik. Jergilikti atqarýshy organdar qar shyǵarý úshin aldyn ala oryndar daıyndady, oqý-jattyǵý kezinde drenajdy sý ótkizý qurylystary tazartylady, ınertti materıaldar daıyndalady, ıaǵnı, barlyǵy pysyqtalady», - dedi TJM Tótenshe jaǵdaılardy joıý departamentiniń bastyǵy Kaharman Orazalın.
Oqý-jattyǵýdyń birinshi kúnindegi sharalar Buqar jyraý aýdanynyń Sadovoe aýylynda ótti. Avarııalyq-qutqarý qyzmetteri men qurylymdarynyń kúshterin, quraldarynyń daıyndyǵyn baıqaý, dalalyq lager qurý, adamdardy sýdan qutqarý, Nura ózenindegi muzdy jarý jáne kesý, qardy shyǵarý, aryqtardy, arnalardy tasqyn sýlardy ótkizýge daıyndaý boıynsha tapsyrmalar oryndaldy.
«Tótenshe jaǵdaılarǵa daıynbyz. Bizdiń mindetterimizge alǵashqy medıtsınalyq kómek kórsetý jáne qajet bolǵan jaǵdaıda medıtsınalyq mekemelerge tasymaldaý kiredi. Bir brıgadada tórt adam bar – dáriger, feldsher, júrgizýshi jáne psıholog. Biz osyndaı oqý-jattyǵýlarǵa únemi qatysamyz, shartty túrde zardap shekkenderge kómek kórsetemiz jáne áriptesterimizben tájirıbe almasamyz», - deıdi Qaraǵandy oblysy Apattar medıtsınasy ortalyǵynyń dárigeri Erken Qudaıbergenov.
Qaraǵandy oblysy boıynsha TJD aqparatyna saı, óńirde 149 eldi meken, 99 avtojol ýchaskesi jáne 237 sý sharýashylyǵy qurylystary baqylaýda. Turǵyndardy sý basý qaýpi bar aýdandardan evakýatsııalaý qajettigi týyndaǵan jaǵdaıda, olar arnaýly 235 qabyldaý pýnktine ornalastyrylady.
Qajettilik bolsa, sý tasqynynyń saldaryn joıý úshin jeke quramnyń 3 myńnan astam adamyn, 1 388 tehnıkalyq quralyn, 70 júzý jáne 360 sý aıdaý tehnıkasyn tartý josparlanǵan.
