Kóksý qant zaýyty qamystan qant óndirýdi bastady

TALDYQORǴAN. QazAqparat - Almaty oblysyndaǵy Kóksý qant zaýyty modernızatsııadan ótip, alǵash ret qamystan qant óndire bastady. Buǵan deıin kásiporyn shekerdi qant qyzylshasynan alatyn, dep habarlaıdy QazAqparat tilshisi.

Bul zaýyttyń jyl on eki aı jumys isteýine múmkindik berip otyr. Sáıkesinshe jumys ónimdiligi artyp, el naryǵyna usynylatyn qant kólemi de eselenbek.

Qant shıkizaty Brazılııa men Meksıka elderinen tasymaldanady.

Qyzylshaǵa qaraǵanda qamystan qant óndirýde asa bir aıyrmashylyq joq. Jartylaı daıyn shıkizat joǵary temperatýramen shyrynǵa aınalady.

Arnaıy tsentrafýgalar arqyly qant súzilip alynyp, aǵartylady. Túsinde de, dáminde de eshqandaı ózgeshelik joq. Basty ereksheligi onyń ónimdiliginde, deıdi kásiporyn basshysy.

«Shyǵý ónimi qyzylshada 12 paıyz bolatyn bolsa, mynda shamamen 99 paıyz ónim shyǵady. Shıkizattyń ózinen», - deıdi qant zaýytynyń dırektory Altynbek Abatov.

Zaýyttyń jańa óndirisine 400-deı jumysshy qýandy.

Eger qant qyzylshasyn óndirý kezinde nebári tórt aı jumys istegen bolsa, endi jyl boıy eńbek etip, jalaqy alady.

Solardyń qatarynda 13 jyldyq eńbek ótili bar zerthana qyzmetkeri Jazıra Dúspekova da bar.

«Buǵan deıin jumys maýsymdyq bolǵandyqtan ol kezde basqa jaqtan jumys izdep ketetinbiz. Endi úzilmeıdi. Jumysymyzdyń toqtamaı jalǵasyp jatqanyna rızamyz»,- dedi zerthana qyzmetkeri Jazıra Dúspekova.

Kásiporyn sońǵy 4-5 jylda jumystyń 80 paıyzyn avtomattandyrdy. Memleket qoldaýynyń arqasynda janarmaıdan kógildir otynǵa aýysty.

Sáıkesinshe shyǵyn azaıyp, ekologııalyq talaptar saqtala bastady.

Eki túrli shıkizatty qosqanda zaýyt bir jylda 60 myń tonna taza qant shyǵara alatyn múmkindikke ıe boldy.

Dese de, Almaty oblysy elge qajet qanttyń nebári 15 paıyzyn óndiredi.