Kókshetaýlyqtar Konstıtýtsııa kúnin atap ótti
Sharaǵa oblystyń qurmetti azamattary, memlekettik mekemelerdiń basshylary, shyǵarmashylyq jáne ǵylymı ıntelegentsııa, qoǵamdyq uıymdar, depýtattar korpýsy jáne jastar qatysty.
Jınalǵan qaýym aldynda aımaq basshysy Málik Myrzalın sóz sóılep, Konstıtýtsııa kúni merekesimen quttyqtady.
«Qazaqstan Konstıtýtsııasy - bul zańmen bekitilgen ulttyq ıdeıa. Egemendi elimizdiń barlyq jetken jetistikteri Konstıtýtsııamyz ben sony negizge ala otyryp daıyndalǵan zańdar arqyly keldi», -dedi ákim.
Sonymen qatar, aımaq basshysy búgingi tańda elimiz Tórtinshi ónerkásiptik revolıýtsııa jaǵdaıynda, jańa belesterdi baǵyndyrý jolynda damýdyń bıikterine baǵdar ustaǵanyn da atap ótti.
Jınalǵandardyń nazaryna Qazaqstannyń Táýelsizdik alǵannan keıingi qalyptasý joldary, Elbasy Nursultan Nazarbaevtyń qazaq memleketin qurýdaǵy basty róli men zamanaýı Astananyń damý kezeńderi týraly «Naznachennyı vremenem» atty eki serıaly derekti fılm usynyldy. Aqmola oblystyq sotynyń tóraǵasy Dosjan Ámirov, Kókshetaý gýmanıtarlyq-tehnıkalyq mektep-lıtseıiniń dırektory Natalıa Dementeva fılmnen alǵan áserimen bólisti.
