Kókshetaýlyqtar Astana kúnin dúrkiretip atap ótti

KÓKShETAÝ. QazAqparat - Kókshetaýda Astananyń 20 jyldyq mereıtoıyna arnalǵan «Astana-arman qala!» atty merekelik saltanatta shara ótti, dep habarlaıdy QazAqparat tilshisi.

Táýelsizdik alańynda uıymdastyrylǵan sharaǵa qala ákimi Ermek Marjyqpaev qatysyp, quttyqtaý sóz sóıledi. Ol Elbasy N.Nazarbaevtyń bastamasymen salynǵan elimizdiń júregi Astana 20 jyldyń ishinde barsha qazaqtyń aqtalǵan úmitine, maqtanyshy men qýanyshyna aınalǵanyn atap ótti.
«Astana - rýhanı jańǵyrý men birliktiń uıytqysy bolyp otyr. Astanamen birge astanalyq oblystyń ortalyǵy - Kókshetaý qalasy da kórkeıip keledi», deı kele qala ákimi óńirdiń áleýmettik-ekonomıkalyq damýyna súbeli úles qosyp júrgen bir top kókshetaýlyqtardy «Astana 20 jyl» merekelik medalimen jáne Alǵys hattarmen marapattady.
Sonymen qatar, mereke sheńberinde qalalyq saıabaqta oqý men qoǵamdyq ómirde ózderin jaqsy qyrynan kórsetken oqýshylar «Jas Ulan» uıymyna qabyldandy.