Kókshetaýlyq feldsher: Árqaısymyz kúnine ortasha 12 shaqyrtýǵa baramyz

KÓKShETAÝ. QazAqparat - Kókshetaý qalasyndaǵy «Viamedis» jaýapkershiligi shekteýli seriktestigine qarasty jedel medıtsınalyq kómek ortalyǵynyń feldsheri Fılıpp Kım naýqastarǵa medıtsınalyq kómek kórsetýden esh aıanyp qalǵan emes. Tipti jumystan tys ýaqytta da ol muqtaj adamdarǵa kómektesýge tyrysady. Aýrý azabyn tartyp, kómek suraı kelgen naýqasqa qaraılasý, qoldan kelgen medıtsınalyq kómek kórsetýdi ol óziniń kásibı mindeti, ári adamı paryzy dep sanaıdy. Osy rette, jan-jaǵyndaǵylarǵa meıirimniń shýaǵyn sebezgilep júrgen kásibı maman Fılıpp Kım QazAqparat tilshisine naǵyz feldsherdiń qandaı bolýy kerektigi týraly óz kózqarasymen bólisti.

Fılıpp eshqashan dáriger bolamyn dep oılamapty. Onyń medıtsına salasyna kelýine ózindik sebebi bar. Óndiristik jaraqat alǵan anasyn kútip baqqan ol medıtsına salasynyń adamzat balasyna paıdasy qanshalyqty ekenin túsinip, dáriger bolý týraly sheshim qabyldaıdy.

«Dárigerler anama ota jasap, aıaǵynan tik turǵyzdy. Sony kórgennen keıin men de medıtsına qyzmetkeri bolýdy sheshtim», - dep eske alady keıipkerimiz.

Shahtınsk qalasynyń týmasy Fılıp bastapqy da baǵdarlamashy mamandyǵy boıynsha bilim alǵan. Keıin bul onyń mamandyǵy emes ekenin túsinedi. Degenmen, ol densaýlyq saqtaý salasyndaǵy eńbek jolyn qalalyq aýrýhananyń qabyldaý bóliminde sanıtar bolyp bastaıdy. Salanyń ystyq-sýyǵyn endi sezine bastaǵan jas jigittiń armany naýqastarǵa alǵashqy bolyp medıtsınalyq kómek kórsetý. Ony bul asqaq armany adastyrmaıdy. Ata – anasy qoldaýymen ol Qarǵandy qalasyndaǵy medıtsına kolledjine oqýǵa túsedi.

«Men Qaraǵandy qalasyndaǵy kolledjge jedel medıtsınalyq kómek feldsheri mamandyǵy boıynsha oqý tústim. Ony bitirgen soń Shahtınsk qalasynda jedel járdem brıgadasynda feldsher bolyp jumys istedim. Keıin atam otbasymen birge kindik qany tamǵan jeri Aqmola oblysyna oraldy. Men de otbasymen birge osynda kóship kelip, óz mamandyǵym boıynsha jumys istep jatyrmyn», - dep jalǵastyrdy Fılıpp.

Keıipkerimiz jumys isteıtin Jedel medıtsınalyq kómek ortalyǵy ómirge qaýip tóndirmeıtin sozylmaly aýrýlardyń asqynýyn jáne jeńil jaraqattardy bildiretin tórtinshi qońyraý sanatyna qyzmet etedi. Alaıda, adamdar aýrý belgilerin dál aıta almaıdy, sondyqtan keıde basy aýyrǵan naýqasqa barǵan feldsher ınsýltpen aýyrǵan adamdy qutqarýy múmkin. Sonymen birge keıbir adamdar dene qyzýy 37 gradýs bolǵan kezde de jedel járdem shaqyrtyp jatady. Olarǵa dárigerler, árıne, keledi. Biraq ta, osy kezde ózge bir naýqas ólim aýyzynda jatýy múmkin. Osynyń barlyǵy jedel járdem brıgadasynyń qyzmetkerleriniń jumysshy qanshalyq aýyr ári jaýapty ekenin kórsetedi.

Fılıpptiń áriptesteri de onyń aýysym aıaqtalǵannan keıin de dáriger bolyp qala beretinin jáne bireýdiń kómekke muqtaj ekenin kórse, birden qol ushyn sozatynyn aıtady. Alaıda Fılıpptiń ózi mundaı jaǵdaılar týraly aıtýǵa qulyqsyz. Ol muny kásibı mindeti ári adamı paryzy dep sanaıdy.

Feldsherdiń pikirinshe, dárigerdiń basty qasıetteriniń biri-únemi damý, oqytý jáne ózin-ózi jetildirý. Eger dáriger, meıli feldsher bolsyn basynda teorııalyq turǵydan túk bolmasa, onda ol adamǵa medıtsına salasynda jumys isteýdiń keregi joq. Kolledj de, ýnıversıtet te mamanǵa bazalyq bilim beriledi, al negizgisin tájirıbeden alady.

Sonymen birge ol dáriger úshin óziniń emotsııasyn ustaı bilý mańyzdy ekenin atap ótti.

«Siz aınalańyzdaǵy jaǵdaıǵa nemese qorqynyshqa qaramastan kómek kórsetýge mindettisiz. Keıde naýqastyń týystary janjal shyǵarady, biraq siz olarǵa emes, eń birinshi aýyryp jatqan adamnyń ómirine alańdaýyńyz kerek. Bul jaǵdaıda sizdiń aldyńyzda kim turǵany mańyzdy emes, naýqasqa birjaqty qaramaý kerek. Sol sebepti, naýqasqa medıtsınalyq kómek kórsetý - meniń kásibı mindetim ári adamı paryzym dep esepteımin», - dep túıindedi dáriger.

Fılıpp jumys isteıtin jedel medıtsınalyq kómek ortalyǵynda 10 feldsher jumys isteıdi. Árqaısysy kúnine ortasha 12 shaqyrtýǵa barady.

Dárigerlerdiń aıtýynsha, pandemııa kezinde medıtsına qyzmetkerleri jumys isteý óte aýyr boldy. Birinshi tolqynynda kimdi qalaı emdeý kerektigin eshkim bilmedi, aýrýhanalarǵa naýqastar lyq toldy. Qazir bári qalypqa túsip, jumys sál jeńildep otyrǵan jaıy bar.

Aıta ketsek, Aqmola oblysynda jedel járdem shaqyrý 6,8 paıyzǵa tómendedi.