Kókshetaýlyq ismer qolóner buıymdaryn jasap, salt-dástúrdi dáriptep keledi
KÓKShETAÝ. KAZINFORM - Salt-dástúrdi berik ustanǵan qoly epsekti, jany izgilikke qumar kókshetaýlyq apa Kenjebaı Smaǵulqyzy oıýmen oıyn jetkize biletin jandardyń biri deýge bolady.
Týǵan jeriniń tylsym tabıǵatymen syrlasyp, saıyn dalanyń taý-tasyn, qyrat-dóńesin jatqa bilip ósken, sol beıneni shynaıy taza qalpynda júreginde saqtaı bilgen keıipkerimiz sonaý 1943 jyly Mońǵolııanyń Baıan-ólgeı aımaǵynda dúnıege kelgen eken. 1992 jyly atajurty Qazaqstanǵa kóship kelipti.
«Men Qazaqstanǵa alǵash ret 1991 jyly Semeıdegi Abaı Qunanbaevtyń mýzeı-keshenindegi kıiz úıdi jasaý úshin issaparymen keldim. Jeti qolóner sheberi keldik, sondaǵy oıý-órneginiń barlyǵyn biz jasadyq. Birneshe kıiz úı jasadyq. Bes aıdaı jumys istep qaıttyq. Artynsha, bir jyl ótken soń atajurtqa búkil otbasymdy alyp keldim», - deıdi Kenjebaı apa.
Bastapqyda Aqmola oblysynyń Tselınograd aýdanyna qonys aýdarǵan. Onda mektepte eńbek páninen sabaq berip, jas jetkinshekterge ulttyq qolónerdiń qyr-syryn úıretken. 1998 jyly Kókshetaý qalasyna at basyn burady. Qazirgi tańda oblys ortalyǵynda ulttyq qolóner buıymdaryn jasap, salt-dástúrdi dáriptep keledi.
Jasy 81-degi Kenjebaı apa on saýsaǵynan óner tamǵan qólónerdiń has sheberi. Ine men jipti janyna serik etken apanyń basqan kıizi men kilemderi, mataǵa qıyp jasaǵan kesteli buıymdary eriksiz kózdiń jaýyn alyp, tańdaı qaqtyrady.
«Qolónermen jastaıymnan aınalysyp kelemin. Keste tigý, syrmaq oıý, shı oraý, kilem toqýdy anamnan úırendim», - deıdi keıipkerimiz.
Búginde Kókshetaý qalasy men Soltústik Qazaqstan oblysynyń barlyq mýzeıinde Kenjebaı apanyń qolynan shyqqan týyndylar kóp. Táýelsiz el tarıhyndaǵy mańyzdy oqıǵalardyń qaı-qaısysyna bolmasyn, qolónerimmen ózindik úles qosyp keledi. Daıyn matany satyp alyp, oıý-órnegin jabystyra salmaıdy. Qoıdy qyrqyp, jún tútý, urshyq ıirip, quraq basýdyń bárin bir ózi bastan-aıaq atqaryp shyǵady.
«Osy ýaqytqa deıin neshe túrli kilem de toqydym, adamdardyń portretin kilemge túsirdim. QR Tuńǵysh Prezıdentinen bastap, Abaı, Abylaı han jáne Qanysh Sátpaev sııaqty tulaǵalarymyzdyń beıneleri órnektelgen kilemder toqydym. Táýelsizdiktiń 30 jyldyǵy arnap biraz dúnıeler jasadym. Bıyl Kókshetaý qalasynyń irgesi qalanǵanyna 200 jyl tolady. Osy dataǵa baılanysty shı toqydym», - dep qosty sheber.
Has sheber osy kúni qol qýysyryp otyrǵan joq, túrli qoǵamdyq is-sharaǵa belsendi qatysyp, jastarǵa ónerin nasıhattap, úıretýmen jáne sonymen qatar qaıyrymdylyqpen aınalysyp júr. Tipti, qazirdiń ózinde aıyna eki ret Astanaǵa baryp, sondaǵy úıirme ortalyǵynda jastarǵa qolónerdiń qyr-syryn úıretip, tájirıbesimen bólisedi.
Onyń qolónerge qosqan úlesi de eskerýsiz qalyp otyrǵan joq. Ol Túrkistanda ótken halyqaralyq qolónershiler kórmesine qatysyp, III orynǵa ıe boldy. QR Táýelsizdiginiń 10 jyldyq mereıtoıyna oraı Almaty qalasynda ótken is-sharada II oryndy jeńip aldy. 2017 jyly búkil álem elderiniń nazaryn aýdarǵan «EKSPO-2017» halyqaralyq kórmesindegi Aqmola oblysy mádenıeti kúnderi aıasynda «Etnoaýyl» ulttyq-mádenı kesheninde ótken sándik-qoldanbaly óner sheberleriniń kórmesine, sondaı-aq, el Táýelsizdiginiń 30 jyldyǵyna, Naýryz meıramy tárizdi memlekettik merekelerge baılanysty jıi ótip turatyn kórmelerge belsene qatysady.
Sonymen birge, Kenjebaı apa alty balany dúnıege ákelgen «Kúmis alqa» ıegeri, nemere, shóbere súıip otyr. On saýsaǵynan óner tamǵan ismerdiń kenshe qyzy Zeınep anasynyń jolyn qýyp, qolóner buıymdaryn jasaýmen aınalysady. Nemereleriniń arasynda da ájesiniń izin jalǵap júrgenderi bar.
