Kókshetaýdaǵy Qylshaqty ózeninde sýdyń deńgeıi artyp keledi
KÓKShETAÝ. KAZINFORM – Aqmola oblysy ákimdiginiń baspasóz qyzmetiniń málimetinshe, Kókshetaýda Qylshaqty ózenine quıylyp jatqan aǵyn sýdyń ulǵaıýyna baılanysty kúrdeli jaǵdaı qalyptasyp otyr.
Aımaq basshysy Marat Ahmetjanov oblys ortalyǵynda vokzal mańyndaǵy aýmaqty aralap, Jandildınov kóshesinde turatyn turǵyndarmen de kezdesti. Olardyń baspanalary ózen boıyna jaqyn ornalasýyna baılanysty úıleri sý basý aýmaǵynda tur.
«Men jaǵdaıdyń kúrdeliligin túsinemin, sizderden shydamdylyq tanytýlaryńyzdy suraımyn. Bıylǵy jyly aýa raıynyń qolaısyzdyǵyna baılanysty oblys ortalyǵynda osyndaı keleńsiz jaǵdaı bolyp otyr. Jaǵdaıdyń ýshyǵýyna jol bermeý úshin bar kúsh-jigerimizdi jumyldyryp jatyrmyz», - dedi Marat Ahmetjanov.
Shyǵyndy óteýge qatysty ákim árbir jaǵdaı jeke jáne shuǵyl túrde qaralatynyn atap ótti.
«Sheshim týraly biz sizderge mindetti túrde habarlaımyz. Birneshe nusqa qarastyrylyp jatyr», - dedi oblys ákimi.
Aıta ketsek, 6 sáýirdegi jaǵdaı boıynsha Kókshetaýda ózen jaǵasyn nyǵaıtý jumystary júrgizilip jatyr. Sý tasqynyna qarsy jumystarǵa QR Ulttyq Ulan akademııasynyń 60 kýrsany kómekke kelgen. Jalpy, barlyǵy 326 adam jáne 122 tehnıka jumyldyrylǵan.
Eske salaıyq, budan buryn Kókshetaýda Qylshaqty ózenindegi sýdyń deńgeıi túspeı turǵany jazǵan edik.
