Kókshetaýda jylyna 300 myń tonna ósimdik maıyn óndiretin zaýyt salynady

KÓKShETAÝ.KAZINFORM - Aqmola oblysynda maıdy syǵyndylaý zaýytyn salý jónindegi iri ınvestıtsııalyq jobany iske asyrý jumysy bastalady.

«Sodrýjestvo Qazaqstan» seriktestigi kúnbaǵys, raps, soıa jáne zyǵyr tuqymdaryn tereń óńdeıtin joǵary tehnologııalyq kásiporyn qurýdy josparlap otyr.

Aýyl sharýashylyǵy mınıstrligi málimetinshe, zaýyttyń óndiristik qýaty — táýligine 3 myń tonna shıkizat, ıaǵnı jylyna shamamen 1 mln tonna. Kásiporynda jyl saıyn 300 myń tonnaǵa deıin ósimdik maıy jáne 400–500 myń tonna shrot pen jom óndiriledi. Jobany iske asyrý merzimi 18 aıdan 36 aıǵa deıin dep josparlanyp otyr.

Jobaǵa tartylatyn ınvestıtsııanyń jalpy kólemi 76 mlrd teńgege baǵalanyp otyr. Nátıjesinde 400-ge deıin jańa jumys orny ashylady.
Kompanııa dırektory Aleksandr Samoılovtyń aıtýynsha, bul kásiporyn maıly daqyldardy óńdeý naryǵynda aldyńǵy qatarda.

– Bizdiń zaýyt óńirdi sapaly ósimdik maıymen, sondaı-aq qus jáne mal sharýashylyǵynda suranysqa ıe janama ónimder — shrot pen jommen qamtamasyz etedi, - dedi ol.

Kásiporyndy iske qosý maı-toń maı salasyn damytýǵa jáne aýyl sharýashylyǵy ónimderin óńdeýdiń zamanaýı ınfraqurylymyn qalyptastyrýǵa mańyzdy serpin beredi.

Aıta keteıik, bıyl Qashaǵanda gaz óńdeý zaýyty iske qosylady.

Alataýda úı janýarlary azyǵyn óndiretin jańa zaýyt ashylady.