Kókshetaýda jasóspirimder kópqabatty úıdiń shatyrynda fotosessııa jasaǵan
Bıik ǵımarattyń shatyrynda serýen quryp júrgen jasóspirimderdiń vıdeosy áleýmettik jelilerde jarııalanyp jatyr. Vıdeo avtory ata-analardy balalaryn baqylaýda ustaýǵa shaqyrady. «Úıdiń shatyrynyń aınalasyndaǵy qorshaý da óte alasa – tizeden tómen ekenin kórip otyrsyzdar», - deıdi ol.
Jeli qoldanýshylarynyń qaldyrǵan jazbalaryna qaraǵanda úılerdiń shatyryna shyǵýǵa esh tosqaýyl joq. Lıýkter únemi ashyq, baqylaýsyz.
«Jelidegi vıdeo zertteldi. Osy boıynsha polıtsııa qyzmetkerleri atalmysh turǵyn úıde boldy. Anyqtalǵandaı, shatyrǵa shyǵatyn lıýk ashyq bolǵan, jasóspirimder sol jerden shyqqan. Turǵyn úı keshenine qyzmet kórsetetin uıymmen júrgizilgen jumystan keıin, lıýkke qulyp ornatyldy. Kámeletke tolmaǵandardyń kim ekenin anyqtaý boıynsha is-shara qolǵa alyndy. Atalmysh úıdiń turǵyndarymen profılaktıkalyq áńgime ótkizildi», - dep túsindirdi Aqmola oblystyq Polıtsııa departamentiniń baspasóz qyzmetinen.
Aıta ketsek, budan buryn Aqmola oblysynda bolǵan qaıǵyly oqıǵa týraly jazǵan edik. Eki jasar bala dalada turǵan dárethanaǵa qulap, kóz jumdy.
