Kókshetaýda jaldamaly páterinde marıhýana saqtaǵan er adam ustaldy

KÓKShETAÝ. QazAqparat – Kókshetaýda marıhýana saqtady degen kúdikpen Jambyl oblysynyń turǵyny ustaldy. Kúdiktiniń jaldamaly páterin tintý kezinde 1 kg astam marıhýana tárkilendi, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń málimetinshe, 51 jastaǵy kúdikti Aqmola oblysy PD esirtki qylmysyna qarsy is-qımyl basqarmasynyń qyzmetkerleri júrgizgen jedel-izdestirý is-sharalary barysynda qolǵa túsken.

«Kúdikti - Jambyl oblysynyń turǵyny, Kókshetaýǵa qurylysqa jumys isteýge kelgeni anyqtaldy. Onyń jeke zattary men jaldamaly páterin tintý kezinde 1 kg 100 gr keptirilgen marıhýana tabyldy. Kúdikti marıhýanany ózi qoldaný úshin ala kelgenin aıtty. Qazirgi kezde kúdiktige qatysty Qylmystyq kodekstiń 296-babynyń 4 bóligi boıynsha sotqa deıingi tergep-tekserý bastaldy», - dedi vedomstvodan.

Aıta ketsek, budan buryn Aqmola oblysynda esirtki saıttaryn jarnamalaǵan eki petropavldyq sottalǵanyn jazǵan edik.