Kókshetaýda zańsyz berilgen jer ýchaskesi memleketke qaıtaryldy

KÓKShETAÝ. QazAqparat – Kókshetaýda prokýratýranyń aralasýymen zańsyz berilgen jer ýchaskesi memleketke qaıtaryldy, dep habarlaıdy QazAqparat tilshisi Aqmola oblystyq prokýratýranyń baspasóz qyzmetine silteme jasap.

Vedomstvonyń málimetinshe, Kókshetaý qalasynyń prokýratýrasy turaqty negizde jer zańnamasynyń saqtalýyna tekserip otyrady. Osy rette, Qazaqstan Respýblıkasy Jer kodeksiniń 48-babynyń 1-tarmaǵyna sáıkes atalmysh tarmaqta kózdelgen jaǵdaılardy qospaǵanda, memlekettik menshiktegi jáne paıdalanýǵa berilmegen jer ýchaskelerin usyný nemese jalǵa alý quqyǵyn berý aýktsıon arqyly júzege asyrylady.

«Tekseris barysynda Kókshetaý qalasy ákimdigi aýktsıon júrgizbesten kireberis joldarǵa qyzmet kórsetý úshin 94,6 ga aýmaǵymen jer ýchaskesine ýaqytsha óteýli paıdalaný quqyǵyn bergeni anyqtaldy. Kókshetaý qalalyq prokýratýrasymen ýaqtyly qabyldanǵan sharalar nátıjesinde kadastrlyq quny 223 mıllıon teńgeden astam jer ýchaskesi memleketke qaıtaryldy. Osy baǵyttaǵy jumys jalǵasýda», - dedi Aqmola oblystyq prokýratýrasynyń baspasóz qyzmetinen.

Aıta ketsek, Aqmolada 50 mln teńgeni jymqyrǵan qurylys basqarmasy bastyǵynyń orynbasary sottaldy.