Kókshetaýda sý tasqynynan zardap shekken 8 otbasy baspanaly boldy
KÓKShETAÝ. KAZINFORM - Kókshetaýda sý tasqynynan zardap shekken 8 otbasy baspanaly boldy. Páter kiltin aımaq basshysy Marat Ahmetjanov tabys etti.
Oblys basshysy birlesip atqarǵan jedel sharalar men kúsh-jigerdiń arqasynda sý tasqynynyń saldaryn barynsha azaıtýǵa qol jetkizilgenin atap ótti.
«Memleket basshysy «Eshkim nazardan tys qalmaıdy. Árbir azamat, árbir otbasy memlekettiń tıisti qamqorlyǵymen qamtamasyz etiledi» dep atap ótken bolatyn. Búgin osy tapsyrmany oryndaý aıasynda tabıǵı apattan úıleri jaramsyz bolyp qalǵan jáne múlkine zalal kelgen turǵyndarǵa páter kiltterin tabystaýdy jalǵastyryp jatyrmyz», - dedi Marat Ahmetjanov.
Bul joly oblys ortalyǵynda turatyn segiz otbasy baspanaly boldy. Olar páterdi óz qalaýynsha tańdap alǵan. Ákimniń aıtýynsha, osy kúni sý tasqynynan zardap shekken Vernadskıı kóshesindegi eski turǵyn úılerdi syrý jumystary bastalǵan. ıAǵnı, apatty jaǵdaıdaǵy úılerdiń ornyna qazirgi zamanǵy kóppáterli turǵyn úıler turǵyzylmaqshy.
«Búgingi qýanysh bizdiń otbasymyz úshin ǵana emes, sý tasqynynan zardap shekkender barsha aqmolalyq úshin de mańyzdy. Memlekettiń qamqorlyǵynyń arqasynda olardyń da baspanaly bolatynyna senim mol. Osyndaı qıyn kezde qoldaý bildirip, qamqorlyq kórsetken el Prezıdentine shynaıy alǵysymyzdy bildiremiz. Páterimiz jaıly, otbasymyzdyń alańsyz ómir súrýine barlyq jaǵdaı jasalǵan», - dep qýanyshymen bólisti qala turǵyny ıÝlııa Nıkolaeva.
Aıta keteıik, búgingi tańda Kókshetaý qalasynda úılerin sý basyp, jaramsyz bolyp qalǵan 11 otbasyna páter satyp alyndy. Sonymen birge, sý tasqynynan zardap shekken ózge azamattarǵa da qoldaý kórsetilip, búlingen múlkin qalpyna keltirý boıynsha barlyq qajetti shara qabyldanyp jatyr. Sý tasqyny bastalǵannan beri barlyǵy 1054 aqmolalyq 100 aılyq eseptik kórsetkish mólsherinde birjolǵy tólem aldy. Turǵyn úılerdiń apattylyǵy jáne odan ári turýǵa jaramdylyǵy boıynsha materıaldyq zalaldy baǵalaý jumystary júrgizilip jatyr.
Óńirdiń Aqkól, Arshaly, Ereımentaý, Jaqsy, Zerendi jáne Tselınograd aýdandarynda 74 otbasynyń úılerin jóndeýge jumsalǵan shyǵyny óteldi.
Eske salaıyq, Kókshetaýda sý tasqynynan zardap shekkenderden alǵashqy otbasy baspanaly bolǵan edi.
