Kókshetaýda sıntetıkalyq esirtki satýmen aınalysqan erli-zaıypty ustaldy

KÓKShETAÝ. QazAqparat - Kókshetaýda sıntetıkalyq esirtki satýmen aınalysqan erli-zaıypty ustaldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.

Vedomstvonyń málimetinshe, Polıtsııa departamenti esirtki qylmysyna qarsy is-qımyl basqarmasynyń qyzmetkerleri Kókshetaý qalasynyń Temirjolshylar saıabaǵy aýmaǵynda esirtki jasyryp júrgen 24 jastaǵy er adam men onyń 22 jastaǵy súıiktisin ustady. Erli-zaıypty kúdiktilerden esirtki salynǵan 30 orama tárkilendi.

«Er adamdy jeke tintý kezinde 27 orama tabyldy. Aldyn ala anyqtalǵandaı, tabylǵan zat «a-PVP pıraleronynyń qurylymdyq analogy» sıntetıkalyq esirtkisi bolyp shyqty. Al, áıelden esirtki jasyrylǵan jerdi sýretke túsirip, geolokatsııa retinde jiberý kezinde qoldanylatyn telefon tárkilendi», - dedi vedomstvodan.

Budan bólek, saıabaq aýmaǵyn tekserý barysynda kúdiktiler jasyrǵan taǵy 3 orama tárkilendi.

«Kúdiktiler kórshi oblystan kelip, jaqynda kepilger bolyp jumysqa ornalasqanyn, ınternette sóılesken belgisiz adamnan esirtki alǵanyn aıtty. Olar bar bolǵany 10 kún jumys istep, quqyq qorǵaý organdarynyń qolyna tústi»,- dep atap ótti Aqmola oblysy PD esirtki qylmysyna qarsy is-qımyl basqarmasynyń bastyǵy polıtsııa polkovnıgi Meıram Japbasov.

Kúdiktilerge qatysty Qylmystyq kodekstiń 296-shy baby 2-bóligi boıynsha sotqa deıingi tergeý amaldary qolǵa alyndy.