Kókshetaýda qazaq tiliniń mártebesin kóterý máselesi talqylandy

KÓKShETAÝ. QazAqparat - Kókshetaýda Sh.Shaıahmetov atyndaǵy «Til Qazyna» ulttyq ǵylymı-praktıkalyq ortalyǵynyń bastamasymen Qazaqstan halqynyń tilderi kúni merekesine oraı «Qazaqstannyń bolashaǵy - qazaq tilinde» atty respýblıkalyq semınar ótti, dep habarlaıdy QazAqparat tilshisi.

«Dostar» mádenıet saraıynda uıymdastyrylǵan sharaǵa Aqmola oblysy ákiminiń orynbasary Aına Mysyrálimova, belgili saıasatker, Qazaqstannyń eńbek sińirgen qaıratkeri Dos Kóshim, atalǵan ortalyqtyń termınologııa jáne onomastıka bóliminiń aǵa ǵylymı qyzmetkeri, til janashyry Japsarbaı Qýanyshev qatysyp,  memlekettik tildiń mártebesin kóterý, latyn qarpine kóshý máseleleri tóńireginde óz oılarymen bólisti. Semınarda memlekettik tildi qoǵamnyń talabyna saı qoldaný aıasyn keńeıtip, mádenı qazynamyzǵa aınalýyna tyrysýymyz qajettigi keńinen aıtyldy.

Sharaǵa qatysýshy zııaly qaýym ókilderi, memlekettik qyzmetshiler, jastar qaýymy da jas urpaqtyń boıynda ulttyq rýhty qalyptastyrý úshin balalarǵa aldymen óz ana tilimizdi úıretip, balabaqshada, mektepte úsh tilde bilim berýge maratorıı jarııalaý qajettigi týraly óz oılarymen bólisip, semınar sońy suraq-jaýap formatyna ulasty.

Aıta keteıik, Qazaqstan halqy assambleıasy ǵylymı-saraptama keńesiniń múshesi, saıasatker Dos Kóshim, sondaı-aq, Qazaqstan Respýblıksy Mádenıet jáne sport mınıstrligi Til saıasaty komıtetiniń ókilderi, qoǵam belsendileri bastaǵan jumys toby búgin jáne erteń oblysymyzdyń Ereımentaý, Qorǵaljyn aýdandarynda da osyndaı semınarlar ótkizip, qazaq tiliniń memlekettik til retindegi mártebesin kóterý, memlekettik tildiń qoldanylýy, qazaq tilin latyn qarpine kóshirý jáne onomastıka máselelerine qatysty nasıhat jumystaryn júrgizetin  bolady.