Kókshetaýda elordanyń Nur-Sultan atalýyna oraı kontsert ótti
«Býrabaı» sport saraıynyń aldynda uıymdastyrylǵan sharada jergilikti shyǵarmashylyq ujymdar ónerlerin ortaǵa salsa, sportshylar men zııaly qaýim ókilderi júrek jardy tilekterin bildirdi.
Sharada Qazaqstannyń eńbegi sińgen qaıratkeri, belgili jazýshy-dramatýrg Jabal Erǵalıev, «Nur Otan» partııasynyń Aqmola oblystyq fılıaly «Jas Otan» jastar qanatynyń tóraǵasy Sultanbek Bekishev, Aqan seri atyndaǵy Kókshetaý joǵary mádenıet kolledjiniń oqytýshysy Hákim Hasambaı, Shoqan Ýálıhanov atyndaǵy Kókshetaý memlekettik ýnıversıtetiniń 4-shi kýrs stýdenti Qurmanbek Ádilet, Sambodan halyqaralyq dərejedegi sport sheberi, Aqmola oblysy «Aqmola barysynyń» birneshe dúrkin chempıony, sambo kúresinen álem chempıonatynyń júldegeri jáne Azııa chempıony, sambo kúresinen Qazaqstan Respýblıkasynyń birneshe dúrkin chempıony Nurlan Jamalov, Dúnıejúzilik kóshpendiler oıyndarynyń júldegeri Leonıd Staneev QR Tuńǵysh Prezıdenti - Elbasy Nursultan Nazarbaevtyń elordany salyp, álemge tanytqan eńbegin joǵary baǵalap, alǵystaryn bildirdi.
«Men elordaǵa Elbasynyń esimin berý sheshimin qoldaımyn. Nursultan Ábishuly bizge Táýelsizdik syılaǵan, jas memleket qurǵan jáne ony bar álemge pash etken Ult kóshbasshysy, sondaı-aq Eýrazııanyń júregine irgetasyn qalaǵan elordanyń avtory. Sol sebepti elordamyzǵa «Nur-Sultan» ataýyn berýge Tuńǵysh Prezıdentimiz ábden laıyq jáne óskeleń urpaqqa esimi óshpes mura bolady dep oılaımyn. Elbasynyń otandyq sportqa degen yqylasy men qoldaýynyń arqasynda elimizde sport salasy qarqyndy damýda. Oǵan halyqaralyq jarystardy otandastarymyzdyń jeńis tuǵyrynan kórinip júrgeni aıqyn dálel bolady», dep atap ótti Nurlan Jamalov.
Sonymen qatar, Lázzat Ydyrysova jáne Farhat Saǵymbaev, «Dostar» kvarteti, «Shamshyraq» dýetteri sııaqty talanty ánshiler men shyǵarmashylyq ujymdardyń ónerin tamashalaýǵa jınalǵan halyqtyń qarasy kóp bolyp, kópshilik ortasyna shyqqan ár ónerpazǵa qoshemet-qoldaý kórsetip, shabytyn shalqytyp, arqalandyrǵandaı.
Elbasy men elimizdi, mahabbat pen sulýlyqty jyryna qosqan ónerpazdardyń kontsertik baǵdarlamasy baýrysaq taratý sharasymen jalǵasyn tapty. Sharaǵa jınalǵan 3 myńnan astam kókshetaýlyq jas talanttardyń ónerine kýá boldy. Olardyń qatarynda respýblıkalyq, halyqaralyq baıqaýlarǵa qatysqan daryndy órender bar. Sharanyń sońynda jınalǵandar bir adamdaı kókshetaýlyq «Arlannyń» nur-sultandyq «Nomad» hokkeıshileriniń arasyndaǵy pleı-oft kezdesýin tamashalady.
